Се хсæн сæрмагонд æфсæддон операцийы зонæйы архайджытæн æмæ сæ бинонтæн
«Лесотерапия для каждого». Ахæм сæргондимæ социалон проекты нысан у, йе нæниздзинад хъыгдард кæмæн у, ахæм адæмæн æххуыс кæнын. Се хсæн сæрмагонд æфсæддон операцийы зонæйы архайджытæн æмæ сæ бинонтæн. Проект кусы Дзæуджыхъæуы дендропарчы территорийы. Проекты фыццаг фæлварæнты тыххæй радзурдзæн Хъайтмазты Дзерассæ.
Рог, æнцонвадат æмæ ахæм ирд. Социалон проект «Лесотерапия»-мæ гæсгæ 8-аздзыд Саулаты Давидæн æрбаластой инвалидон коляскæ. Лæппуйæн ацы бон ахсджиаг у. Разæй æнæхъæн сæрд, йе мбæлттимæ фембæлдтытæ æмæ хъæзтытæ æрдзы хъæбысы. Ныр æнæ къуылымпыдзинæдтæй.
Давид йæ мадимæ цæры Мæскуыйы, ахуыр кæны кадджын скъолайы, стыр ныфсытæ йыл æвæрынц скæсæн хъæбысхæстыты. Æрæджы сывæллонæн пъланмæ гæсгæ скодтой операци йæ фадты вальгусы деформаци сраст кæнынæн. Уый йæ хъыгдæрдта йе спортивонтæ гæнæнтæ æххæстæй раргом кæнынæн, зæгъы йæ фыд. Инновацион методикæмæ гæсгæ операци скодта дохтыр Куыдзаты Хъазыбег. Тагъд æвзонг пациент ферох кæндзæн йæ къæхты рысты тыххæй, фæлæ реабилитаци домы фæразондзинад æмæ æххуыс.
Саулаты Хъазыбег у хæстон цауты ветеран. Сæрмагонд æфсæддон операцимæ ацыд бархионæй. Батальон «Ахмат»-ы хыгъды иста æнцойгæнæн пункт Лисичанскы. Уый ахсджиаг хæс уыд. Уæззау тох, æнæмбæрц тыхтæ, ныхмæлæууæгмæ – артиллери, дронтæ, танктæ. Æхстытæ, рæмыгъдтытæ. Дарддæр цы уыд, уый зынтæй хъуыды кæны.
3 операцийы, цæстæй нал уыны, контузи. Хъазыбег куыд зæгъы, афтæмæй уыцы уæззау цæфты фæстиуджытæ йæ куы нæ къуылымпы кодтаиккой, уæд ныр уыдаид фронты. Абон та йæ йæ уавæры фæнды йæ бæстæйæн æмæ æхсæнадæн пайда хæссын.
Хъазыбег кæд æрдзæй фидар у, уæддæр ын абон алцыдæр зын кæнын у. Йæ лæппуйы йæ къухтыл хæссын ныр йæ бон нæу. Инвалидон коляскæ Давиды реабилитацийы рæстæг æнæмæнг хъæугæ фæрæз у. Социалон активист æмæ æнæкоммерцион проект «Лесотерапия»-йы разамонæг Тотраты Линæйы хъæппæрисæй бантыст ацы фарста цыбыр рæстæгмæ алыг кæнын æнæ бюрократон къуылымпыдзинæдтæй. Йе *нæниздзинад хъыгдард кæмæн у, уыцы адæмæн дендрарийы территорийы тезгъо кæнынæн сæ бон у инвалидон коляскæтæ лæвар исын.
Æмæ ма уый у, патриотизмы иу дæнцæг – йæ бон баххуыс кæнын кæмæн у, уыдон уыцы хъуыддаг сыгъдæгзæрдæйæ æмæ лæвар куы феххæст кæнынц, уæд.
