Ахæм æмбырд дзы уыд фыццаг хатт, фæлæ йæ фæнд кæнынц традицион скæнын
Мæздæджы районы Советскийы поселочы арæзт æрцыд кадджын мадзал. Евгений Камарзаковы номыл скъолайы ахуырдзауты райстой кадетты рæнхъытæм. Ахæм æмбырд дзы уыд фыццаг хатт, фæлæ йæ фæнд кæнынц традицион скæнын. Кадетты кълас арæзт æрцыд ацы ахуыры азы райдиан. Бацыдысты йæм канд бынæттон лæппутæ нæ, фæлæ ма Мæздæгæй æмæ районы æндæр хъæуты минæвæрттæ дæр. Лæппутæ сæ зæрдæмæ хæстæг айстой ардбахæрыны бон. Арфæйы ныхæстæ æмæ ныстуантæ сын скодтой ветеранты Советы уæнгтæ, æхсæнадон организациты минæвæрттæ, «Хæстон æфсымæрады» æфсæддонтæ. Уазджытæн æмæ ахуырдзаутæн кадеттæ равдыстой сæ зонындзинæдтæ рæнхъытæй раст цæуынæй, Калашниковы автомат æмбырд кæнынæй, хæстон зарджытæ кæнынæй æмæ æмдзæвгæт аив кæсынæй. Мадзал фæци кадетты вальсæй.
