филиал вгтрк государственная телерадиовещательная компания “Алания”

01:42 понедельник, 14 июля 2025
22 ноября 2013, 11:47
Спортивон арæзтæдты республикон программæ æххæстгæнгæйæ Кировы районы байгом 2 спортивон фæзы

Фæсивæдæн дзы ис, мини-футболæй, баскетболæй æмæ волейболæй архайыны фадат. Ацы цаумæ цæрджытæ рагæй æнхъæлмæ кастысты. Сæхи йæм сæрмагондæй бацæттæ кодтой.

Спортивон арæзтæдты республикон программæ æххæстгæнгæйæ Кировы районы байгом 2 спортивон фæзы
Фæсивæдæн дзы ис, мини-футболæй, баскетболæй æмæ волейболæй архайыны фадат. Ацы цаумæ цæрджытæ рагæй æнхъæлмæ кастысты. Сæхи йæм сæрмагондæй бацæттæ кодтой.

Ставд-Дурты спортивон фæз кæй байгом, уый хъæуы цæрджытæн у æхсызгон цау, уæлдайдæр та лæппутæн. Джыгкайты Вадим куыд зæгъы, афтæмæй ныр ам йе `мбæлттимæ æдзухдæр ерыстæ араздзысты. Скъолайы стадионы футболæй хъазын зын у, уæдæ баскетболон фæз дæр нал бæззы.

Джыгкайты Вадим: «Ацы фæз кæй сарæзтой, уый нын тынг æхсызгон у. Раздæр кæм хъазыдаиккам, уый нæ уыдис. Мах ам зæрдæрухсæй хъаздзыстæм. Чи йæ сарæзта, уыдонæн дæр стыр бузныг».

Ставд-Дурты скъолайы ахуыр кæны 100 сывæллонæй фылдæр. Ам спортивон фæз кæй фæзынд, уымæн стыр социалон нысаниуæг ис, зæгъы ахуыргæнæндоны директор Дзугкойты Бэлæ. Уымæн æмæ фæсивæдæн сæхи ирхæфсынæн хъæуы бирæ фадæттæ нæй.

Дзугкойты Бэлæ, Ставд-Дурты скъолайы директор: «Сывæллæттæ спорт уарзынц. Ахæм бон нæ вæййы, æмæ мæнæ нæ фарсмæ цы стадион ис, уырдæм ма æрбацæуой. Фылдæр уарзынц футбол лæппутæ, чызджытæ баскетбол. Æндæр гæнæнтæ нын нæй, уарзынц гимнастикæ дæр, фæлæ нын уавæртæ нæй».

Елхоты дæр уыдис спорты бæрæгбон. Ам дæр байгом кодтой ахæм фæз. Сырх лент алыг кæныны бар æрхауд 2-æм скъолайы ахуырдзаумæ æмæ фæсивæды хъуыддæгты, физкультурæ æмæ спорты министр Челæхсаты Рустеммæ. Спортивон фæзтæ байгом кæнын бантыст сæрмагонд республикон программæ æххæстгæнгæйæ.

Батиаты Хъæзыбег, Кировы районы администрацийы сæргълæууæг: «Нæ фыццаг хæс у, цæмæй сывæллæттæ уынгты ма уой, фæлæ исты спортыл хæст уой. Абон ма сын ахæм фадат фæцис. Ныр дарддæр архайдзыстæм, цæмæй иннæ хъæуты дæр , ахæм фæзтæ гом æрцæуой».

Мини-футбол, баскетбол, волейбол. Фæсивæдæн фæзы сæ бон у спорты ацы хуызтæй архайын. Сæрмагонд резинæ дзы кæй ис йæ уæлцъары, уый фæрцы та сæхи къаддæр ныццæвынц. Скъоладзаутæ фæз афæлвæрдтой æвæстиатæй.

Кировы районы кæддæриддæр уыд хъæздыг спортивон традицитæ. Бирæ зындгонд спортсментæ рацыд ардыгæй. Чи зоны, ацы фæзты цы фæсивæд архайдзæн, уыдон дæр фидæны схиздзысты спорты бæрзæндтæм.

Иу хъазæн фæз ма Елхоты чысылдæр цæрджытæн балæвар кодта Наталья Водяновайы фонд «Обнаженные сердца». Сывæллæттæ ардæм æрбацæуынц змисæй хъазынмæ, къуыбырæй бырынмæ, æмæ æндæр аттракционтыл сæхи аирхæфсынмæ.
Дудайты Азæмæт: «Æз ардæм æрбацæуын мæ бабуимæ, ме `мбæлттимæ. Се `ппæты тынгдæр мæ зæрдæмæ цæуынц машинæтæ».

Ныртæккæ ацы хъазæн фæз Кировы районы у иунæг. Бынæттон администрацийы куыд фехъусын кодтой, афтæмæй бацархайдзысты, цæмæй фæпарахатдæр уа, ууыл.

темæмæ гæсгæ
vgtrk_alania
vgtrk_alania
vgtrk_alania
vgtrk_alania