Уый тыххæй фехъусын кодта францусаг спортивон газеттæй иу. Цæгат Ирыстоны ацы хъусынгæнинаг бирæты зæрдæмæ нæ фæцыд.
Уымæн æмæ нæ республикæйы хъæбысхæст у традицион спорты хуыз. Уæвгæ йæ олимпаг хыгъдæй рагæй сисынмæ хъавыдысты. Фæлæ нæ зындгонд тренертæ куыд зæгъынц, афтæмæй уымæн уæвæн нæй. Бразили æнæ футболæй куыд нæ фидауы, афтæ мах дæр æнæ хъæбысхæстæй не сфидаудзыстæм. Биазрты Савелий кæддæр бацæттæ кодта олимпаг чемпион Давид Мусульбесы. Ныртæккæ та йæ ныфсытæ бæтты æвзонг спортсментимæ. Райсом ацы фарстаты фæдыл хъæбысхæсты хуызты иугонд æппæтадæмон Федераци сараздзæн æмбырд. Дунеон олимпаг комитет та цы уынаффæ рахæсдзæн, уый сбæрæг уыдзæн майы.
Биазрты Савелий, УФ-йы сгуыхт тренер: «Махæн Ирыстоны нæ фыццаг спорт хъæбысхæст у. Тынг бирæ сывæллæттæ уынгæй ардæм кæнæм. Ныртæккæ нал у уæ бон хъæбысæй хæцын, нæй уын фæндаг Олимпаг хъæзтытæм, уый зæгъын сын никæй бон бауыдзæн. Мæнæн мæ бон нæу сывæллæттæн зæгъын, уæ ныфсытæн нал ис гæнæн. Мæнмæ гæсгæ уыцы хабар хъуамæ ма ‘рцæуа, уымæн гæнæн нæй».
