21 азы онг юниоркæты *хсæн æппæтуæрæсеон ерысты архайдта 100 адæймагæй фылдæр Уæрæсейæ æмæ Белоруссийæ
Спортивон хъæбысхæстæй цæттæдзинады тренировкæгæнæн центры уыд 3 хатты олимпаг æмæ дунейы 10 хатты чемпионкæ Галина Гороховайы призтæ рамбулыны турнир фехтованийæ. 21 азы онг юниоркæты *хсæн æппæтуæрæсеон ерысты архайдта 100 адæймагæй фылдæр Уæрæсейæ æмæ Белоруссийæ. Сæ арæхстдзинад æвдыстой куыд шпажисткæтæ, афтæ рапиристкæтæ дæр. Турнир аразджытæ сты Уæрæсейы æмæ Цæгат Ирыстоны спорты министрадтæ, стæй бæстæйы фехтованийы Федераци. Бæлвырддæр радзурдзæн Хъайтмазты Дзерассæ.
Хъарм хъæбыстæй байгом сты 3 хатты олимпаг æмæ дунейы 10 хатты чемпионкæ Галина Гороховайы призтæ рамбулыны æппæтуæрæсеон ерыстæ юниоркæты хсæн. 5 азы размæ Советон Цæдисы æмæ Уæрæсейы сгуыхт тренеры хъæппæрисæй арæзт æрцыд турнир.
Ацы бонты спортивон хъæбысхæстæй цæттæдзинады тренировкæгæнæн центры бирæ адæм ис. Юбилейон, 5-æм турнирмæ Дзæуджыхъæумæ æрбацыдысты кадджын уазджытæ. Олимпаг чемпионкæ æмæ 1974-æм азы дунейы хуыздæр фехтовальщицæ Валентина Никонова, олимпаг æмæ дунейы бирæ хæттыты чемпион Александр Романьков. Уыдон æвзонг чызджытæн сты ацы спорты дæнцæг.
Спортивон хъæбысхæстæй цæттæдзинады центр арæзт æрцыд нацпроект «Демографи»-йы федералон программæ «Спорт – царды норма»-мæ гæсгæ. Фехтованийæ ерыстæ баиу кодтой 100 адæймагæй фылдæры Уæрæсейæ æмæ Белоруссийæ. Турниры фыццаг бон сæ арæхстдзинад æвдыстой 21 азы онг шпажисткæтæ, дыккаг бон та – рапиристкæтæ.
Дунеон спорты æнтыстдзинæдты æмæ спорты райрæзтмæ цы æвæрæн бахаста, уый тыххæй спортсменты уæрæсейаг цæдис æмæ бæстæйы олимпаг комитет Галина Гороховайæн саккаг кодтой зæрдылдарæн лæвар.
Ацы бонты ма спортивон хъæбысхæстæй цæттæдзинады тренировкæгæнæн центры цæуы иу ахсджиаг цау –æппæтадæмон къласы спорты мастер Годжиаты Владимиры ном мысæн æппæтуæрæсеон ерыстæ фехтованийæ. Республикæйы кад дзы хъахъхъæны 70 спортсмены.
