Бынат дзы ис 150 сывæллонæн
Республикæйы ахсджиагдæр фарстатæй иу у Мæздæжы районы социалон-экономикон райрæзт. Уымæ гæсгæ йæм стыр æргом здæхт цæуы. Станицæ Луковскæйы байгом кодтой, нырыккон домæнтæн дзуапп чи дæтдзæн, ахæм рæвдауæндон. Бынат дзы ис 150 сывæллонæн. Сывæллæтты цæхæрадон байгом кодтой кадджын уавæры, архайдта дзы нæ республикæйы сæргълæууæг Битарты Вячеслав.
Мæздæджы станицæ Луковскæйы сывæллæтты рæвдауæндон байгом кадджын уавæры. Æрбахуыдтой уазджыты дæр. Республикæйы сæргълæууæгæн равдыстой, 150 сывæллоны кæм хъомыл кæндзысты, уыцы агъуыстытæ. Ифтонг у медицинон уатæй, нырыккон домæнтæм гæсгæ арæзт хæрæндон, ис дзы бассейн дæр æмæ гæрзтæхсæн уат.
Рæвдауæндоны ис хи хъармгæнæн, агъуыстытæ ифтонг сты æппæт хъæугæ хæдзары дзаумæттæй, кæрты та сывæллæтты хъазæн фæзуат. Кусæнуаты уыдзæн 8 къорды, уыдонæй 2 сты хæрзгыццыл сывæллæтæн. Хъомылгæнинæгтæм æнхъæлмæ кæсынц хæстæгдæр рæстæг, арæзт æрцыд хыгъд, бахастой йæм 110 сывæллоны. Кусгæ та дзы кæндзæн 30 адæймаджы.
Объект арæзт æрцыд 8 мæймæ. У дыууæуæладзыгон. Проект царды рацыд паддзахадон федералон программæ «Ахуырады райрæзт» æххæстгæнгæйæ.
Мæздæджы районы райрæзт ахсджиаг фарста у нæ республикæйæн. Ам фæстаг 15 азы нæ байгом кодтой рæвдауæндон, æрмæст фарон хъуыддаг сызмæлд. Мæздæджы дзы 230 сывæллонæн байгом кодтой сывæллæтты цæхæрадон.
Сывæллæтты рæвдауæндæм стыр рад кæй уыд раздæр, уыцы фарста ныр лыггонд цæуы. Районты уæвгæ дæр къуылымпыдзинад нæй, Дзæуджыхъæуы та рады нымæц фæкъаддæр. Хæстæгдæр рæстæг ма нæ республикæйы сæйраг сахары байгом кæндзысты цалдæр уæлæмхасæн бæстыхайы.
