Дидинджыты æмæ тыхджын къухæмдзæгъды лæвæрттæ райста Цæгат Ирыстоны адæмон æмæ Уæрæсейы Федерацийы сгуыхт артист Хуыгаты Сурен
Сценæйæн æгæрон лæггадгæнæг. Дидинджыты æмæ тыхджын къухæмдзæгъды лæвæрттæ райста Цæгат Ирыстоны адæмон æмæ Уæрæсейы Федерацийы сгуыхт артист Хуыгаты Сурен. Ирон театры ирддæр стъалыйы 65 азы фæдыл бенефисмæ æрбацыд бирæ адæм. Зæгъæн ис, æмæ 40 азмæ Сурен сценæйы сарæзта бирæ ирд сурæттæ. Сæ иу – Хуыгаты Георы пьесæмæ гæсгæ æвæрд спектакль «Сау нымæт». Кæй дзы ахъазыд, æмæ, æмтгæй райсгæйæ, йæ юбилейон бæрæгбон куыд ацыд, уый тыххæй радзурдзæн Моргуаты Ладæ.
Адæм куыд сырдтæ, сырдтæ та куыд адæм, ахæм арф хъуыды æвæрд ис Хуыгаты Георы пьесæ «Сау нæмыты». Уарзт æмæ фыдох, æнувыд æмæ хæрамдзинад, иу спектаклы æвдыст цæуы царды æцæгдзинад. Ирд сурæттæ дзы чи сарæзта, уыдон та сты театры раззагдæр артисттæ. Спектакль ныр 10 азы фæндаг ары театрдзауты зæрдæтæм. Бирæтæ федтой цалдæр хатты.
10 азмæ спектаклы ахъазыдысты театры ирддæр стъалытæ. Иу артисттæ баивтой иннæты, фæлæ æнæбаивгæ у Бирæгъты раздзог Чобры фæлгонц аразæг – Хуыгаты Сурен.
Ацы спектаклæй йæ 65 азы юбилей сбæрæг кодта Цæгат Ирыстоны адæмон æмæ Уæрæсейы Федерацийы сгуыхт артист Хуыгаты Сурен дæр. Æрбацыдысты йæм, йæ курдиатæн аргъ чи кæны, уыцы театрдзаутæ, хæстæджытæ æмæ, кæй зæгъын æй хъæуы, йе мкуысджытæ.
Æнæкæрон курдиат æмæ хъæздыг миддуне, ахæм миниуджытæй хайджын у Хуыгаты Сурен. Щепкины театралон училищæйы рауагъдон 80-йæм азты æрбацыд ирон академион театрмæ, æмæ дзы уæдæй абонмæ сарæзта дæсгай сурæттæ æмæ фæлгонцтæ. Ахъазыд кинонывты дæр. Ибрагим – Къостайы «Фатимæ»-ы, Горькийы пьсæ «На дне»-йы уыд Васька Пепел, Шекспиры «Паддзах Лир»-ы та йæхиуыл абарста Эдгары фæлгонц. Уæдæ «Сау нымæт»-ы бирæгъты раздзог Чобр та йæхи зæрдæмæ уæлдай тынгдæр фæцыд æмæ уыцы сурæтимæ рацыд йæ бенефисы.
Æмæ та ногæй арф æнкъарæнтæ, цæссыджытæ æмæ, кæй зæгъын æй хъæуы, арфæйы ныхæстæ, уарзон юбиляры номыл æмæ тыхджын къухæмдзæгъд.
