Уыцы цау сбæрæг кодтой йæ уарзон ансамбль «Алан»-ы
Сценæйæн чи райгуырд, ахæм ирд стъалы. Байаты Альбинæйы иунæг хатт чи федта кафты, уый, æнæмæнг, хæст у ацы хъуыдыйыл. Ирыстойнаг хореографийы легендæ рæсугъд фæд ныууагъта аивадуарзджыты зæрдæты. Йæ алы змæлд дæр дисы фтыдта, æмæ хаста удæнцойдзинад. Ацы бонты Альбинæйы райгуырдыл сæххæст 80 азы. Уыцы цау сбæрæг кодтой йæ уарзон ансамбль «Алан»-ы. Куыд цæттæ кодтой сæхи артисттæ, уый тыххæй радзурдзæн Касаты Наирæ.
Ансамбль «Алан»-ы фидауц кафынц æрыгон артисттæ. Ацы репетицитæ сын сты ансамблы зындгонд солисткæйы номарæн концертмæ. Аивадуарзджыты размæ Байаты Альбинæйы номарæн изæр рахæсдзысты абон. Ныр та уал ирон адæмы цæмæй базыдтой, уыцы уæздан кафт, стæй, легендароны æмвæзадмæ схизыны фæлтæрæнтæ. Козаты Зелимханы цæстдардæй кафджытæн рæдыды бар нæй. Куыд зæгъы, афтæмæй адæймагмæ ахæм æнкъарæнтæ ис, цыма æрыгон артистты кафтмæ кæцæйдæр кæсы. Кæддæр «Алан»-ы аивадон разамонæг йæхæдæг дæр Байаты Альбинæимæ æрттывта иу сценæйы.
Легендæйы сценæйы баивынæн æцæгæйдæр гæнæн нæй. Йæ курдиатæй адæмы уарзон артисткæ суæвын ын балæвар кодта хъысмæт. Фæлæ йæ гыццыл чызг уæвгæйæ чи зыдта, дунейыл хъуыстгонд Байаты Альбинæ дзы кæй рауайдзæн, уый. Цыбыр рæстæгмæ аивадуарзджыты зæрдæты бацахста арф бынат. Равзæрстой йæ паддзахадон ансамблы солисткæйæ, уый фæстæ та сси ацы аивадон артдзæсты разамонæг.
Йæ царды фыццаградон хæсыл нымадта аивадæн лæггад кæнын. «Алан»-ы фæстæ æрлæууыди филармонийы ансамблы сæргъы. Куысты карз æмæ домаг, царды та фæлмæнзæрдæ. Иу адæймаджы бирæ рæсугъд миниуджытæ. Уый уыди, иннæ адæмæй йæ цы хицæн кодта, уый. Альбинæйы цур чи куыста, уыдонæн æрмæст разамонæг нæ уыди, фæлæ сæ зæрдæмæ хæстæг адæймаг.
Байаты Альбинæ æрыгон артисттæн рæдауæй лæвæрдта йæ зонындзинæдтæ. Бирæ зындгонд адæмæн байгом кодта аивады дунемæ дуæрттæ. Ирон национ культурæ та базонын кодта, зæгъæн ис æмæ æнæхъæн дунейæн.
Байаты Альбинæйæ бирæтæ дзырдтой, уый райгуырди кафтæн, зæгъгæ. Сценæйæн снывонд кодта йæ цард. Йæ алы фезмæлдæй дæр арæзта, æмбал кæмæн нæ уыди, ахæм фæлгонцтæ.
Абон ансабль «Алан»-ы артисттæ аивадуарзджытæн æвдисынц, кæддæр Байаты Альбинæ кæй кафыд, уыцы номертæ. Ахæм у фæлтæрты бастдзинад.
Не хсæнæй ацыди уæззау низы фæстæ. Йæ хæлæрттæ, йæ аивадæн ын стыр аргъ чи кодта, æмæ йæ чи зыдта, уыдон æнхъæл уыдысты, йе стъалы никуы ахуысдзæн, зæгъгæ. Байаты Альбинæ сси, мин азы иу хатт чи райгуыры, æмæ йæ цыбыр цардмæ æгæрон хæрзты чи бацæуы, ахæм артисткæ. Адæймагмæ афтæ кæсы, цыма Альбинæ йæхæдæг нæ равзæрста аивад, фæлæ гуыргæ уымæн ракодта. Хæсты фæстæ фыццаг аз Кавказы Хуссайраг горæты райгуырд гыццыл чызг. Уый фæстæ стыр кад скодта Кавказæн, айхъуысын æй кодта дунейыл, стæй йæхæдæг дæр баззад легендæйæ.
