Сæрмагонд æргом аздахын хъæуы Намысы мемориалмæ, уым хъæуы Намысы къул среставраци кæнын
Стыр Уæлахизы 80 азмæ республикæйы базилдзысты се *ппæт хæстон мемориалон комплекстæм. Сæрмагонд æргом аздахын хъæуы Намысы мемориалмæ. Уым хъæуы Намысы къул среставраци кæнын. Кавказы тох цы мозаикæйыл æвдыст цæуы, уымæ хъæуы сæрмагондæй зилын. Бæлвырддæр радзурдзæн Хъайтмазты Дзерассæ.
Кавказы тохы истори у паннойыл. Дурыл æвдыст цæуынц хæстытæ, матростæ куыд хъæбатырæй тох кæнынц, сæдæаздзыд Базраты Тасолтан та партизанты размæ куыд кæны, уый. Мозаикæйы уæззау æмæ хъæбатыр цаутæ бацæуын кæнын æнцон нæу. Фæлæ 20 азы размæ нывгæнджытæ Хетæгкаты Аслан, Цæллагты Виктор, Фидараты Фидар æмæ Саулаты Сергей сарæзтой Намысы къул.
Мозаикæ скæныны размæ уыд бæлвырд куыст. Нывгæнджытæ иртæстой хæстон азты æрмæджытæ, ныв кодтой æххæстасджын эскизтæ, уый фæстæ та сæ разамындæй горæт Долгопрудныйы æрмдæснытæ ралыг кодтой æмæ сæмбырд кодтой панно. Мозаикæ конд у каррараг мраморæй – cуанг Микеланджело цæмæй куыста, ахæмæй. Панно ма уымæй хицæн кæны, æмæ нывы фрагменттæ ахуырст не сты, уый у мраморы æрдзон хуыз. Ныртæккæ ацы куыст тæссаг уавæры ис, зæгъынц нывгæнджытæ. Аууондæттæг æмбæлгæ фæрæз кæй нæй, уый тыххæй къæвдадон мозаикæйы бынмæ хъары, сæмбырд вæййы æмæ хæры хуыдтытæ. Бæлæсты уидæгтæ апарахат сты æмæ исынц фундамент. Хуызтæ рæстæгимæ бамынæг сты – мозаикæмæ хъæуы æдзух сæрмагонд буаргъæдæй зилын.
Январы плитатæй иу æрхауд æмæ ныппырх – горæты администрацимæ курдиаты фæстæ йæ йæ бынаты сæвæрдтой.
2025-æм азы бæстæ бæрæг кæндзæн Уæлахизы боны 80 азы. Уæдмæ, æппæт хæстон мемориалтæм хъуамæ уа зылд, зæгъынц горæты администрацийы.
Флорентийаг мозаикæ хъæуы бахъахъхъæнын æмæ уæд намыс нæ фесæфдзæн. Ныр та уал Къулы раз хуры тынты бын ракалд донхæрис.
