Уымæн æмæ бæстыхай уыд зилинаг
Сунжæйы бындуронæй цалцæг кæнынц сывæллæтты 2-æм рæвдауæндон. Ацы цау кусджытæн тынг ахсджиаг у. Уымæн æмæ бæстыхай уыд зилинаг. Куыстыты рæстæгмæ хъомылгæнинæгты суазæг кодтой Горæтгæрон районы 4 рæвдауæндоны. Объекты бындурон цалцæг æххæстгонд цæуы национ проект «Бинонтæ»-м гæсгæ. Бæлвырддæр радзурдзæн Хъайтмазты Дзерассæ.
Сунжæйы сывæллæтты 2-æм рæвдауæндоны куыстытæ сæ тæмæны сты. Национ проект «Бинонтæ»-м гæсгæ объекты райдыдта бындурон цалцæг. Ацы хъуыддагмæ кусджытæ рагæй æнхъæлмæ кастысты.
Рæвдауæндоны бæстыхай арæзт æрцыд 80-æм азты, æмæ дзы 2002-æм азы онг нæ пайда кодтой – уæд хъæуы байгом кодтой фыццаг рæвдауæндон. 6 къорды, музыкалон зал, хæрæн блок, хи хъармгæнæн – 24 азы фæстæ æппæт агъуыстытæ сты цалцæггæнинаг.
Ног къуыри куыстытæм бавналдзысты сантехниктæ. æххæстæй баивдзысты коммуникацитæ, уымæн æмæ къултыл фæзынд хъуына. Проекты нысангонд сты бæстыхайы конструктивон ивддзинæдтæ.
Дыккаг рæвдауæндонмæ цæуы 140 сывæллоны, ис кæстæр кары къорд – 2 азæй фылдæр кæуыл цæуы, уыцы сабитæн. Ныртæккæ хъомылгæнинæгты рæстæгмæ суазæг кодтой Горæтгæрон районы 4 рæвдауæндоны. Се ппæт дæр æнхъæлмæ кæсынц, сæ уарзон бынатмæ æрыздæхынмæ.
Куыстытæ куы фæуой, уæд рæвдауæндоны сног кæндзысты ифтонггæрзтæ дæр. æдæппæтæй нацпроект «Бинонтæ»-м гæсгæ ацы аз республикæйы бындуронæй сцалцæг кæндзысты 6 рæвдауæндоны.
