Уыцы фæрæзтæ хъæуынц æнæмæнг, æмæ сæ схардз кæндзысты бæстыхайы бындурон цалцæг фæуыныл
Сунжæйы культурæйы хæдзарæн республикон бюджетæй уæлæмхасæн радих кæндзысты 3 милуан сомы. Уыцы фæрæзтæ хъæуынц æнæмæнг, æмæ сæ схардз кæндзысты бæстыхайы бындурон цалцæг фæуыныл. Фæрæзтæ кæй радих кæндзысты, уый тыххæй Парламенты Советы æмбырды фехъусын кодта финансты министры 1-аг хæдивæг Оксана Карова. Цавæр куыст цæуы ныртæккæ культурæйы Хæдзары, уый тыххæй радзурдзæн Касаты Наирæ.
Кавказаг ритм перфораторы æмæ дзæбуджы уынæримæ хæццæ. Сунжæйы культурæйы хæдзары доулийы секцимæ цæуынц 20 сывæллоны. Сæ уарзон сфæлдыстадон къорд цалцæггæнæн куыстыты рæстæг дæр нæ ныууагътой.
Актон зал цыфæнды культурæйы хæдзары дæр у сæйрагдæр бынат. Хъомылгæнинæгтæн æмæ сæ ахуыргæнджытæн у, сæ сæр бæрзæндты цæмæй хæссынц, ахæм артдзæст. Стыр сценæ, 450 бынаты, киномеханик æмæ дзы рухсæвæрæгæн сæрмагонд агъуыстытæ. Фæлæ дзы къуылымпыдзинæдтæ ис сценикон кусæнгæрзтимæ.
Ам цалцæггæнæн мадзæлттæ цæуынц цалдæр къæпхæнæй. Ныртæккæ дзы кусынц активонæй. Кусджытæ райхæлдтой, чи нал бæззы, уыцы конструкцитæ æмæ бавнæлдтой бæстыхайы æддаг бакаст аив кæнынмæ. Ивынц электрон тыхы хæтæлтæ, коммуникацитæ. Бындуронæй ног кæнынц æрмæстдæр актон зал æмæ сæйраг агъуыстыты иу хай. Кабинетты æмæ къæридортæн фаг уыдзæни уæлæнгай цалцæг дæр. Ацы бынæтты фæстаг хатт арæзтадон куыстытæ цыдысты 90-æм азты. Уæд дзы сæвæрдтой хъæдын къултæ. Фæлæ, зынгсирвæзтыты ныхмæ системæйы нормæтæн дзуапп нæ дæттынц. Тагъд рæстæджы сæ баивдзысты ногтыл, æдасдзинады фæткмæ гæсгæ. Сунжæйы рæзгæ фæлтæрæн ног, æппæт уавæртимæ культурæйы хæдзар у æнæмæнг хъæугæ. Уымæн æмæ ам сфæлдыстадон къордты æмæ спортивон секциты архайы сæдæгай сывæллæттæ.
Аразджыты ныхæстæм гæсгæ, æппæт куыстытæ цæуынц фæткмæ гæсгæ. Объект ратдзысты ноябры.
