Ацы аз ирон драматургы райгуырдыл æххæст кæны 125 азы. Йе сфæлдыстадæй стыр фæд ныууагъта ирон литературæйы, стæй адæмы зондахасты.
Кочысаты Розæйы пьесæ «Гæды лæг» 45-æм гимназы ахуырдзаутæ равдыстой инсценировкæйы хуызы. Фыццаг ирон сылгоймаг-драматург æй ныффыста, 17 азы дæр ыл куы нæма цыд, уæд. Æвдыст дзы цæуынц революцийы агъоммæйы цаутæ.
Дзугаты-Мурасты Риммæ, горæты сæйраг библитекæйы бæстæзонæн хайады сæргълæууæг: «Розæйы сфæлдыстад тынг æнцон æмбарæн æвзагæй фыст у. Скъолаты программæмæ хаст сты. Кæд цыбыр уыдис йæ цард, æмæ хæрз гыццыл уацмыстæ ныффыста, уæддæр сты тынг цымыдисаг. Сывæллæттæ йын тынг цымыдисæй кæсынц йæ уацмыстæ».
Кочысаты Розæйы ном æрхъуыды кæнынмæ горæты сæйраг библиотекæмæ æрбацыдысты фысджытæ, ахуыргæнджытæ, æхсæнадон архайджытæ. Дзырдтой, драматург ирон литературæйы цы фæд ныууагъта, уый тыххæй. Кæддæриддæр тох кодта сылгоймаджы бартыл. Ацы темæ бынат ссардта йе сфæлдыстады дæр.
Таутиаты Минтæ, Колыты Аксойы премийы лауреат: «Уыцы иуактон пьесæтæ абон дæр тынг зынаргъ сты ирон адæмæн. Фæзæгъынц, ирон æвзаг сæфы, зæгъгæ. Нæ фесæфдзæн. Уымæн æмæ Кочысаты Розæ цы рæстæджы куыста, уæдæй абоны онг дæр нæ литературæ æмæ æвзаг тынг хъæздыг сты. Ирон драматургийæн Розæ куыд сылгоймаг, афтæ сывæрдта бындур, афтæ мæм кæсы. Уый махæн тынг зынаргъ у. Стæй уый тынг ахсджиаг у абоны сывæллæттæн».
Кочысаты Розæ бирæ нæ фæцард – 22 азы. Ныффыста æрмæстдæр 3 пьесæйы – «Гæды лæг» кæнæ «Нæ пъырыстыф сæрра», «Мæ фыды фæдзæхст» æмæ «Зæхх – ме вдисæн, хур – мæ комдзог». Ацы уацмыстæ абон дæр нæ фесæфтой сæ ахадындзинад.
