Ацы æрмæджы та уæ базонгæ кæндзыстæм сылгоймаг уæвгæйæ адæмы æдасдзинадыл чи кусы, æхæм ныфсхаст æмæ йæ дæсныйадыл иузæрдион адæймаг Лали Лотишвилиимæ. Фæндаггон
Адæмæй зонынц мидбылхудт æмæ хæлар ахастдзинæдтæй. Лали Лотишвили у фæндаггон патрулон службæйы инспектор. Черменыхъæумæ хæстæг посты кусы 4 азы. Мидхъуыддæгты министрады оргæнты та дæс азæй фылдæр.
2012-æм азы 23 – æм октябры ам 105-æм контролон уадзæн пункты террорист схæцын кодта рæмудзæн æрмæг. Уæд дзы фæмард иу пъæлицæйаг. Фондзæй фесты уæззау цæфтæ. Лали Литишвили уыди се хсæн. Хъыгдард баййæфта йæ сæр. Мæй æмæ æрдæг фæци рынчындæтты. Фæлæ куы фæдзæбæх уæд рацыд куыстмæ. Фæстæмæ уыцы уадзæн пунктмæ.
Лали Лотишвили, фæндаггон патрулон службæйы инспектор: «Уæд мын уыди ахъуыды кæныны рæстæг. Фæстæмæ уыцы куыстмæ ацæуын, æви нæ. Бирæ хъуыддæгтæ кæрæдзийымæ абарстон, æмæ мæ уæддæр бафæндыд фæстæмæ мæхи куыстмæ раздæхын».
Лали йыл сæтты, уыцы цау æй тасы æфтауы. Фæлæ уыцы хъуыдытæ йæхимæ хæстæг нæ уадзы. Сæйрагдæр ын у, йæ уарзон коллективимæ кæй ис, уый. Ацы адæм бирæ зындзинæдтæн бавзæрстой, царды зилдухæнты иумæ бирæ хатт бахаудтой, фæлæ уæддæр сæ дæсныйадыл сæ зæрдæ нæ ивынц. Лалийы æмкусджыты дисы бафтыдта, ахæм хъуыддаджы фæстæ ма йæ зæрдæ посты æрлæууын куыд бакуымдта, ууыл. Фæлæ йыл цин та бакодтой зæрдиагæй.
Засеты Майрæм, фæндаггон патрулон службæйы инспектор: «Лали у тынг хорз адæймаг. Уæздан æмæ сабыр. Алы уавæры дæр йæхи равдисы æрмæст æвæрццæгæй. Уæдæ йæ куыст дæр хорз зоны. Не хсæн кæй ис, уый нын нæ пост кæны рæсугъддæр».
Куысты фæстæ – хæдзармæ. Уым æм кæд фæнды дæр æнхъæлмæ кæсынц æмæ йыл тыхсынц. «Стыр, æнгом бинонтæ сты разæнгардгæнæг»,- зæгъы Лали.
Уазæгуарзон хæдзары алы бон дæр æрæмбырд вæййынц сæ хæстæджытæ æмæ сыхæгтæ. Ныййарджытæ худынц: уый Лалийы фæрцы, зæгъгæ.
Этери Лотишвили, Лалийы мад: «Нæ хæстæджытæ нæм æдзух дæр æрбадзурынц, Лали хæдзары ис, зæгъгæ. Кæд хæдзары вæййы, уæд уайтагъд амбырд вæййынц. Куыстæй куы æбацæуы, уæд ныл цымæ хур ракæсы, афтæ нæм фæкæсы. Кæд фæллад вæййы, уæддæр нын хъæлдзæг ныхæстæ дæр акæны, хæрзад хæринаг дæр».
Йæ фæлмæн æмæ хæлар зæрдæ алкæуыл дæр æххæссы. Йе `хсæрдæсаздзыд чызг Неллийы ахуыр кæны хæринаг кæныны сусæгдзинæдтыл. Æхсæзаздзыд лæппуйы та цæттæ кæны музыкалон скъоламæ. Фæлæ лæппуйы уый хъæуы æрмæст иумæйаг рарæзты тыххæй. Йæ фидæны дæсныйад ныридæгæн дæр равзæрста.
Бафснайын, хæринаг скæнын, æмæ цæхæрадоны куыстытæ бакæнын. Лали мидбылхудгæйæ зæгъы- æмæ уый зын хъуыддаг у?
Лали Лотишвили: «Æмбаргæ дæр æй нæ кæнын, æнæ мæ бинонтæй цы кæнин уый».
Дыууæ суткæйы хæдзары æмæ та ногæй постмæ. Бæлццæтты бæлвырд кæнын, кæдæм æмæ цæй фæдыл цæуын, уый базонын, хыгъдмæ сæ хæссын. Ахæм фæткы кусгæйæ дæр æдзух вæййы мидбылхудгæ æмæ зæрдæхæлар.
