Сывæллæттæн фæзынд, интернеты ирон æвзагыл хъæзтытæй хъазыны фадат. Сты сайт ирон15.ру-йы

27 января 2014, 11:29

Хъæзтытæй ныридæгæн пайда кæнынц скъолаты. Ахуыргæнджытæ куыд зæгъынц, афтæмæй сывæллæтты зæрдæмæ тынг цæуынц. 13-æм скъолайы ирон æвзаджы ахуыргæнæг Къадзты

Хъæзтытæй ныридæгæн пайда кæнынц скъолаты. Ахуыргæнджытæ куыд зæгъынц, афтæмæй сывæллæтты зæрдæмæ тынг цæуынц. 13-æм скъолайы ирон æвзаджы ахуыргæнæг Къадзты Иринæ кусы райдиан кълæсты ахуырдзаутимæ. Куыд зæгъы, афтæмæй ацы кары сывæллæтты ргом бæлвырд темæмæ раздахын зын у. Хъæуы сæм цымыдисдзинад гуырын кæнын. Уый тыххæй Иринæ урокты фæпайда кæны хъæзтытæй.

Къадзты Иринæ, Дзæуджыхъæуы 13-æм скъолайы ирон æвзаджы ахуыргæнæг: «Сывæллæттæн вæййы тынг æхсызгон урочыты куы фæкæнæм дидактикон кæнæн логикон хъæзтытæ, уæд. Тынг активонæй фæархайынц, цымыдисæй фæкæсынц мæнмæ, фæхъусынц ног æрмæгмæ, сæ сæры хуыздæр бацæуы ног æрмæг. Хъæзтытæ райдиан скъолайы тынг æххуыс сты ахуыргæнæгæн».

Ноджы цымыдисагдæр та сывæллæттæн у ацы хъæзтытæй электрон хуызы хъазын. Къуырийы размæ сайт ирон15.ру-йы фæзынд ирон æвзагыл хъæзтытæ. Ныридæгæн сæ активонæй пайда кæнынц скъолаты. 3-æм къласы ахуырдзау Джыбылаты Зауырбегæн йæ зæрдæмæ цæуынц дзырдбыдтæ.

Джыбылаты Зауырбег, Дзæуджыхъæуы 13-æм скъолайы ахуырдзау: «Дзырдбыды ис 10 къæпхæны. Æз бацыдтæн 4-мæ. Мæн тынг фæнды цæмæй бацæуон 10-æм къæпхæнмæ. Алы хатт дæр дзы вæййы тынг зын ныхæстæ. Хъæуы сæ ныффыссай компьютеры. Мæ бон куы нæ вæййы исты дзырд ныффыссын, уæд дзы ис «æххуыс», куы йыл ныххæцай, уæд дын дамгъæ кæнæ æнæхъæн ныхас равдисы».

Викторинæтæ, антонимтæ, пазлтæ. Æдæппæтæй 10 хъазты. Сæ сæйраг нысан у, сывæллæтты хъуыды кæныныл ахуыр кæнын, стæй се взаджы рæзтыл кусын. Хъæзтытæ бацæттæ кодтой ахуырады æмæ наукæйы министрады заказмæ гæсгæ республикон программæ «Ирон æвзаг» æххæстгæнгæйæ.

Санаты Ритæ, РЦИ-Аланийы ахуырады æмæ наукæйы министрады национ ахуырады хайады сæргълæууæг: «Ахуыргæнджытæн дæр ис стыр гæнæнтæ, стæй скъоладзаутæн дæр куыд рæвдауæндæтты, афтæ хистæр кълæсты дæр. Уыцы æрмæг æрмæст хъазынæн нæу, фæлæ цæмæй ахуыртæм цæттæ кæной скъоладзаутæ æмæ ахуыргæнджытæ, уый тыххæй дæр. Дзурынц телефонтæй ахуыргæнджытæ, рæвдауæндæтты хъомылгæнджытæ, æхсызгон дзурынц, сывæллæттæн тынг цымыдисаг кæй сты. Се `петы дæр курын, цæмæй уыцы сайтмæ цæуой».

Министрады куыд загътой, афтæмæй ацы куыст дарддæр хæццæ кæндзысты. «Ирон æвзаджы» программæ æххæстгонд цæудзæн 2015-æм азмæ.

Ацы аз хъæзтыты номхыгъд фæфылдæр уыдзæн. Уый тыххæй «Ирон æвзаджы» программæйы бюджетæй радих кæндзысты 400 мин сомы. Уыимæ ма сайт ирон15.ру-йы фæзындзæн ноджыдæр 5 мультипликацион кинонывы. Уыдоны дæр аргъæутты хъайтартæ сдзурдзысты иронау.

Хъайтмазты Дзерассæ