филиал вгтрк государственная телерадиовещательная компания “Алания”

Дзæуджыхъæуы 30-æм скъоламæ æрбацыд зындгонд спортсменкæ, Лондоны олимпиадæйы æвзист майданы хицау Цæрукъаты Светланæ. Олимпиадæйы урокæн разамынд лæвæрдта Уæрсейы комплексон спортивон цæгатирыстойнаг скъолайы хицау. Уый скъоладзаутæн радзырдта, Олимпиадæ куыд равзæрд, æмæ дзы фыццаг цавæр спорты хуызтæй ерыс кодтой, уый. Чызджыты æмæ лæппуты зæрдыл æрлæууын кодта нæ республикæйы олимпаг чемпионты æмæ призерты нæмттæ. Се хсæн уæззау атлетикæйы спортсменкæ, дунейы чемпионкæ Цæрукъаты Светланæ. Урочы рæстæг сывæллæттæм бирæ фарстатæ сæвзæрд, æмæ сын Цæрукъаты Светланæ радта бæлвырд дзуаппытæ. Сæйрагдæр та бафиппайдта, олимпиадæмæ фæндаг скъолайы спортзалæй кæй райдайы. Зæгъын хъæуы уый, æмæ 30-æм скъолайы ис æппæт фадæттæ спортмæ æмхицдæр уæвынæн, æрæджы Уæрæсейы президенты грант рамбылдта сæ физкультурæйы ахуыргæнæг Лаура Хачиянц.

Тауытты Валерий, Уæрæсейы комплексон спортивон цæгатирыстойнаг скъолайы директор: «Сывæллæттæ фыццаг хатт федтой Цæрукъаты Светланæйы. Йæ кой йын хъуыстой, йæ къамтæ йын федтой, фæлæ комкоммæ ныхас кæнын хуыздæр у. Сывæллæттæ сæ рæстæг фылдæр компьютеры цур æрвитынц æмæ фæнды, цæмæй спортмæ фылдæр цæуой. Æмæ ацы фембæлдтытæ дæр уымæн пайда сты».