Бæрæгбоны концертмæ ансамбль бацæттæ кодта хъæздыг æмæ цымыдисаг программæ. Сценæмæ рацыдысты æппæтæй чысылдæр артисттæ дæр – сты сфæлдыстадон къорды æмгæрттæ.
Ацы кафтимæ ансамбль «Сæрмæт» фыццаг хатт рацыд стыр сценæмæ. Номер бацæттæ кодтой республикæйы адæмон артист Саутуалты Асланимæ. Уæд аивадуарзджытæ бахъуыды кодтой, сæ зæрдæмæ тынг фæцыд. Абон сфæлдыстадон къорды репертуары ис 20 кафты.
Сæ фыццаг юбилейон концертмæ чысыл кафджытæ сæхи цæттæ кодтой 5 азы. Сæ разамонæгимæ аивадуарзджытæн бацæттæ кодтой рæсугъд лæвар – дунейы адæмты кæфтытæ.
Сценæмæ рацыдысты суанг ансамблы чысылдæр кафджытæ дæр – 5 азы кæуыл цæуы, уыцы сабитæ. Æмæ кæд сæ къахавæрд нырма бынтон бæлвырд нæу, уæддæр сæм æцæг кафджыты темперамент кæй ис, уый бæрæг уыд.
Къусраты Элизæ, адæмон кафты сывæллæтты ансамбль «Сæрмæт»-ы кафæг: «Æз цæуын кафджытæм 3 азы. Мæ зæрдæмæ цæуы. Æз фæкафын хонгæ, перепляс, круговой, еврейский, хевсурски».
Республикæйы бирæ курдиатджын сывæллæттæ ис æмæ сын адæмон кæфтытæ амонын æхсызгондзинад у, зæгъы ансамблы аивадон разамонæг Гугкаты Эдуард. Хореографы ныхæстæм гæсгæ, ацы куыст æнцон нæу. Уыимæ ма ансамблы сæйраг къорды хыгъды ис 55 æвзонг кафæджы.
Гугкаты Эдуард, адæмон кафты сывæллæтты ансамбль «Сæрмæт»-ы аивадон разамонæг: «Æнцон нæу, фæлæ кусын хъæуы, архайын хъæуы. Сывæллæттæ тынг курдиатджын сты. Мæнæ тынг æхсызгон вæййы, сывæллæттæ, æз кæй сахуыр кодтон, уыдон хорз куы фæкафынц, уæд».
Аргентинаг фыййæутты кафт «Гаучо» – аивадуарзджытæн кафджыты къорды лæвар. Сывæллæттæ бацархайдтой кафты элементтæ рæсугъд æмæ бæлвырд равдисыныл. Концерты уазджытæн ма сывæллæттæ æмæ сæ ныййарджытæ скодтой ноджыдæр иу æхсызгон лæвар – иумæйаг кафт «Дзуттаг чындзæхсæв». Архайдта дзы ансамблы аивадон разамонæг йæхæдæг дæр.
«Сæрмæты» кафджытæн се `ппæтæн дæр юбилейон концерт уыд сæ царды ахсджиаг цаутæй иу.
Дауыйаты Ланæ, адæмон кафты сывæллæтты ансамбль «Сæрмæт»-ы кафæг: «Мæнмæ гæсгæ симд у тынг рæсугъд кафт, кафæм æй рæсугъд, ис нын дзы солисттæ æмæ уыдон дæр кафынц тынг рæсугъд».
Концерты архайдтой республикæйы зындгонд артисттæ дæр – Дауыраты Эдуард, Хадыхъаты Аллæ, Тайсауты Олег, Хъуысаты Эльвирæ, Кокойты Аллæ æмæ иннæтæ. Æрыгон кафджытæ канд аивадуарзджыты зæрдæтæ нæ барухс кодтой, фæлæ ма фæндаг ссардтой сæ хистæр хæлæрттæм дæр. Афтæмæй се `ппæты дæр баууæндын кодтой, рæсугъд аивадон фидæн сын кæй уыдзæн, ууыл.
Гугкаты Иринæ
