филиал вгтрк государственная телерадиовещательная компания “Алания”

Стратегион темæ. Сывæллæтты бартыл æрдзырдтой абон Цæгат Ирыстоны Æхсæнадон палатæйы æмбырды. Архайдтой дзы алыхуызон министрадты æмæ æхсæнадон организациты минæвæрттæ. Æмбырд байгом кодта Парламенты сæрдары фыццаг хæдивæг Къесаты Станислав. Йæ хъуыдымæ гæсгæ æхсæнадон палатæйы фæрцы рабарæг кæнæн вæййы нæ царды ахсджиагдæр фарстатæ. Республикæйы Сæргълæууæджы цур сывæллоны бартæн дзуапдæттæг æххæстбарджын Ногъаты Таисия куыд загъта, афтæмæй йæ бæрны хъуыддаджы бирæ лыггæнинаг фарстатæ ис. Фыццаджыдæр фæфылдæр сты, æнахъом сывæллæттæ сæхи куы амарынц, ахæм цаутæ. Уымæй дарддæр нæ фаг кæнынц рæвдауæндæттæ. Бирæ медицинон куыстуæттæ та цух æййафынц неврологтæй, психологтæй æмæ психиатртæй. Ацы хъуыддæгтыл хъæуы иумæйагæй архайын. Ахæм схемæмæ гæсгæ уал кусынц реабилитацион центр «Хæлар зæрдæ»-йы. Æмбырды ма рахастой уынаффæ, сывæллæтты бартыл дзурæг национ стратеги царды уадзыны тыххæй координацион совет саразын. Æмбæлгæ министрадтæн та бахæс кодтой алы кварталы дæр сæ куыстæн хатдзæгтæ кæнын, æмæ сæ Æхсæнадон палатæмæ æрвитын.