филиал вгтрк государственная телерадиовещательная компания “Алания”

Сывæллæтты республикон клиникон рынчындоны хирургийы бæстыхай фæци цалцæггонд. Ис дзы 10 хайады, æмæ се ‘ппæт дæр кусынц, куыд æмбæлы, афтæ. Куыстыты хæрзхъæддзинад сбæрæг кодтой хицауадон къамисы уæнгтæ æмæ æхсæнадон палатæйы минæвæрттæ. Æнæниздзинадхъахъхъхæнынады министрады кусджытæ куыд зæгъынц, афтæмæй ныртæккæ архайдзысты сывæллæтты рынчындоны хæцгæ низты, лабораторийы æмæ хæрæндоны бæстыхæйттæ кæронмæ сцалцæг кæныныл.

Сывæллæтты республикон клиникон рынчындоны сæйраг дохтыр Икъаты Мурат хицауадон къамисы уæнгтæн, стæй æхсæнадон палатæйы минæвæрттæн æвдисы, хæцгæ низты бæстыхай куыд аивта, уый. Ныртæккæ ам куыстытæ кæронмæ нæма æрхæццæ сты. Фæлæ рынчындон ныридæгæн кусы куыд æмбæлы, афтæ. 

Челæхсаты Рустем, РЦИ-Аланийы хицауады сæрдары хæдивæг: «Нæ республикæйы сывæллæтты рынчындон у хуыздæр уавæры, абон йæ нæхи цæстæй федтам, абон махимæ æрбацыдысты æхсæнадон палатæнйы уæнгтæ, нæ пардаменты депутаттæ, цы ныхас нын уыдис, рынчындоны чи кусы, стæй ам чи хуыссы, мæнмæ гæсгæ, хуыздæр уавæры и абон».

Хицауады сæрдары хæдивæг Челæхсаты Рустем куыд зæгъы, афтæмæй рычындоны раздæр куыд уыди æмæ ныр куыд у, уыдон кæрæдзийæ тынг хицæн кæнынц. Бæстыхайы фыццæгæм уæладзыджы ис клиникон лаборатори, ультразвук, æппæт анализтæ раттынæн дæр дзы арæзт æрцыдис хорз фадæттæ. Фæзындис рынчындоны ног кусæнгæрзтæ дæр. Дзуапп дæттынц нырыккон домæнтæн. 

Тыджыты Алыксандр, сывæллæтты республикон клиникон рынчындоны ортопедон-травматологон хайады сæргълæууæг: «Нæ уавæртæ тынг фæхуыздæр сты, скодтой нын ремонт, алы уавæртæ нæм ис рынчынты дзæбæх кæнынæн, хуыздæрæй хуыздæр. Раздæр бирæ операцитæ нæ бон нæ уыдис кæнын, уый тыххæй æмæ нæм аппаратурæ нæ уыдис. Ныр нæм кусæнгæрзтæ фæзындис, æмæ операциты 90-100% аразæм бынаты. Стæм хатт арвитæм нæ рынчынты фæсарæнтæм».

Рынчындоны фæзынд ног рентген дæр. Фæсарæйнаг аппарат у 28 милуан сомы аргъ. Уæдæ рынчындоны дохтыртæ дæр ацыдысты сæрмагонд ахуыртæ, цæмæй ног кусæнгæрзтимæ архайын базоной æмæ сæ æнæкъуылымпыйæ пайда кæной. 

Бокоты Эльбрус, РЦИ-Аланийы æхсæнадон палатæйы секретарь: «Тынг бирæ цæуджытæ нæм уыдис, тынг бирæ фарстатæ нæм лæвæрдтой адæм, цы уавæрты ис рынчындон, цы уавæрты вæййынц сæ сывæллæттæ. Абон цы федтам, уый æмæ уæд, уыдон абаргæйæ кæрæдзимæ дард. Ивддзинæдтæ цæуы. Нæ фаг кæны дохтыртæ, нæ фаг кæны кусæнгæрзтæ, нæ фаг кæны хостæ, æвзæр у хæринаджы хабар. Абон федтам æндæр хуызы, цыма æндæр ранмæ æрбахаудтам, афтæ. Цыдæриддæр загътон ныртæккæ, уыцы фарстатæ ист æрцыдысты».

Цалцæггæнæн куыстытæ райдыдтой 2010-æм азы. Ногдзинæдтæ сæхиуыл банкъардтой рынчындоны пациенттæ дæр. 

Дзахоты Каринæ: «Зын уавæртæ дзы уыдис, ныр ремонты фæстæ тынг хорз уавæртæ дзы ис, сыгъдæг у, дохтыртæ дæр сæ цæстæнгас тынг хорз дарынц, хостæ лæвар дæттынц, æлхæнгæ æппындæр ницы бакодтам».

Бакусинаг фарстаты нымæц ныр дæр чысыл нæу, зæгъы республикæйы æнæниздзинадхъахъхъæнынады министр Владимир Селиванов. Фæлæ министрады архайынц, цæмæй республикæйы сывæллæтты цы фарстатæ тыхсын кæнынц, уыдон къæпхæнгай лыггонг цæуой. Уæрæсейы бирæсывæллонджын бинонты æхсæнадон организацийы цæгатирыстойнаг хайады сæргълæууæг Дзоблаты Альбинæ дæр загъта, сывæллæтты рынчындоны рацарæзты хъуыддагмæ се ‘вæрæн кæй бахæсдзысты, уый.

Дзоблаты Альбинæ, Уæрæсейы бирæсывæллонджын бинонты æхсæнадон организацийы цæгатирыстойнаг хайады сæргълæууæг: «Мæнмæ гæсгæ, сывæллæтты рынчындоны нæ фаг кæны, сывæллæттæ сæхи кæм ирхæфсой, æмæ гыццы сæ рынчындзинад кæм ферох кæной,а æхм бынат, æмæ нæ зæрды и сам кæрты сыразын ахæм хъазæн бынат».

Æхца æрæмбырд кæндзысты æхсæнадон фондтæ, стæй ацы хъуыддаг хорзыл чи банымайа, уыцы адæм. Хъазæн фæз саразынæн хъæуы 360 мин сомы. Уыимæ æнæниздзинадхъахъхъæнынады министрады сын зæрдæ бавæрдтой, хæстæгдæр рæстæг хæцгæ низты бæстыхай кæронмæ саразыныл кæй бацархайдзысты, уымæй. Бакусдзысты лабораторийы æмæ хæрæндоны уавæртæ фæхуыздæр кæнынынл дæр. 

Æрдæгарæзт хæцгæ низты корпусимæ федералон программæмæ бахауд, рынчынтæн хæринаг кæм кæнынц, уыцы бæстыхай дæр. Цалцæггæнæн куыстытæн ацы аз федералон бюджетæй радих кæндзысты 100 милуан сомы. Æдæппæтæй та фæрæзтæ уыдзысты 300 милуан сомæй фылдæр. Куыстытæ цæудзысты 2016-æм азмæ.