Республикæйы театралон архайджыты цæдисæн ацы проект царды рауадзын бантыст культурон хъæппæристы президентон фонды æххуысæй
Сывæллæттæн Нарты кадджыты аудиофысты презентаци ирон æвзагыл уыд национ наукон библиотекæйы. Республикæйы театралон архайджыты цæдисæн ацы проект царды рауадзын бантыст культурон хъæппæристы президентон фонды æххуысæй. 3 мæйы дæргъы аудиохуыз саразыныл куыстой Цæгат æмæ Хуссар Ирыстоны артисттæ, культурæйы æмæ аивады архайджытæ, волонтертæ. Æдæппæтæй скодтой 60 аудиофыстæй фылдæр. Алкæцыдæр баххæст кодтой музыкалон композицийæ – хъисын фæндырыл сæ ацагъдта Паддзахадон филармонийы национ инструментты оркестры аивадон разамонæг Ходы Олег. Кадджытæ сывæллæттæн адаптаци скæныныл бакуыста Уæрæсейы фысджыты Цæдисы уæнг, тæлмацгæнæг Баситы Зæлинæ.
