Иллюстрацитыл бакуыстой Дзæуджыхъæуы аивадон училищæйы студенттæ. Бæлвырддæр радзурдзæн Касаты Наирæ
Мамсыраты Дæбейы номыл сывæллæтты бибилиотекæйы арæзт æрцыд, Хетæгкаты Къостайы æмдзæвгæты ног уагъдæй чингуыты презентаци. Иллюстрацитыл бакуыстой Дзæуджыхъæуы аивадон училищæйы студенттæ. Бæлвырддæр радзурдзæн Касаты Наирæ.
Сывæллæттæ стыр цымыдисæй кæсынц ирд ахорæнтæй аивгон чингуытæ. Кæсынц Хетæгкаты Къостайы æнæмæлгæ уацмыстæй скъуыддзæгтæ. Ныр, æвзонг чиныгкæсджытæн фадат уыдзæн сæ уарзон фыссæджы æмдзæвгæты ног æмбырдгондтæ кæсынæн. Мамсыраты Дæбейы номыл сывæллæтты республикон библиотекæйы уыди Къостайы æмдзæвгæты ногуагъд чингуыты презентаци. Сæ сæргæндтæ – «Коста-сывæллæттæн», «Цъиу æмæ сывæллæттæ», стæй рухстауæгæн йæхи тыххæй æрмæджытæ. Ацы фембæлды æмдзæвгæтæ кастысты республикæйы алы скъолаты минæвæрттæ. Къостайы поэзи у ирд, адæймаджы зæрдæйы гуырын кæны æнахуыр æнкъарæнтæ, миддуне кæны фидардæр. Æнæмæлгæ хъайтартæ, алыварс æрдз, пейзажтæ, адæмы ивгъуыд æмæ фидæн. Хицæн ныхасы аккаг сты иллюстрацитæ. Æххæст кæнынц алы уацмысы мидис дæр. Чингуыты æддаг бакаст дæр хъуамæ уа иттæг райдзаст. Уымæн æмæ сывæллæтты аудитори у домаг.
Æмбырдгондтæ иллюстраци скæныны тыххæй рауагъдад расидт конкурс Дзæуджыхъæуы аивадон училищæйы студентты хсæн. Хетæгкаты Къостайы поэзи уыйбæрц хъæздыг æмæ арф у, æмæ уæрæх кæны алы сфæлдыстадон адæймаджы гæнæнтæ дæр. Алы фæлтæр дæр дзы йæхицæн ссары цавæрдæр фæзилæнтæ.
Рæзгæ фæлтæры цæстытæ цинæйдзаг, уый та ууыл дзурæг у, æмæ Къостайы поэзиæн кæнынц аккаг аргъ.
Æмбырдгондты ис бирæ рæсугъд иллюстрацитæ. Алкæцыйæн дæр дзы йæхи мидис. Кæстæр фæлтæры æнкъарæнтæ та ногæй сразæнгард кодтой ног чингуытæ уадзынмæ. Уæвгæ, рауагъдад йæ размæ уыцы хæс сæвæрдта. Ацы мадзал у сывæллæтты чингуытæ ног хуызы уадзыны серийы фыццаг къахдзæф. Проекты фæрцы рухс фендзысты æндæр нациты классикты уацмысты ног æмбырдгондтæ дæр.
