Йæ режиссер – театралон аивады уæрæсейаг институты рауагъдон Нино Церцвадзе
Араббаг æхсæв, алæмæты гауыз æмæ фæндонтæ чи æххæст кæны, ахæм джинн. Сабибонтæй се *ппæтæн зонгæ аргъау рахастой сценæмæ. Сывæллæтты театр «Саби»-йы æнтыстджынæй авæрд æрцыд спекталь «Аладдины алæмæты лампæ». Йæ режиссер – театралон аивады уæрæсейаг институты рауагъдон Нино Церцвадзе, сæйраг рольты – Хъараты Максим, Гагуылаты Сослан æмæ Браты Камиллæ. Премьерæйы уыд не сфæлдыстадон къорд. Аладдины цымыдисаг цауты тыххæй «Саби»-йы сценæйы радзурдзæн Хъайтмазты Дзерассæ.
Скæсæйнаг бæстæ – Багдад бабæрæг кæнын, алæмæты гауызыл атæхын, æмæ араббаг æхсæв фенын. Театр «Саби»-йы уыд спектакль «Аладдины алæмæты лампæ»-йы премьерæ. Хурыскæсæйнаг музыкæйы æмæ сценæйы цы базар райтыдтой, уый фæрцы сывæллæттæ фыццаг минутæй банкъардтой аргъауы тæваг. Цалынмæ чысыл аивадуарзджытæ сæ бынæттæ ахстой, уæдмæ сæ актертæ ирхæфстой. Сæудæджертæ сывæллæттæм сидтысты сæ товартæ балхæнынмæ. Афтæ райдыдта Аладдины цымыдисаг цауты тыххæй радзырд.
Алæмæты горæт сыгъзæрин галуантимæ æмæ судзæг змисы хъæпæнтимæ æмбæхсы бирæ сусæгдзинæдтæ. Уыдонæй иу – æппæтхъомысджын джины лампæ. Уый сæххæст кæндзæн йæ хицауы 3 фæндоны. Уыцы хæзна Аладдины цард æххæстæй аивта. Актер Гагуылаты Сослан куыд загъта, афтæмæй йын джины роль ахъазын æнцон нæ уыд. Стыр бæрнондзинад ыл æвæрд уыд.
Спектакль æвæрд æрцыд «Иугонд Уæрæсе»-йы æмæ театралон аивады уæрæсейаг институты рауагъдонтæн æххуысы фонды иумæйаг федералон проектмæ гæсгæ. Театр «Саби»-йы фæндты ис, гастрольты сыхаг регионтæм ацæуын. Сæрмагондæй та, сæ спектакльтæ Цæцæны республикæйы сывæллæтты театры равдисын. Фæнд ма кæнынц алыхуызон фестивальты архайын.
Фæстаг хатт спектакль «Аладдин» театр «Саби»-йы æвæрдтой 30 азы размæ. Зындгонд истори ног хуызы равдисыны тыххæй сфæлдыстадон къорд цыбыр рæстæгмæ стыр куыст бакодта. Афтæмæй спектакль сæвæрдтой иу мæймæ.
