Цæгат Ирыстоны ахуыргæнæндæтты стыр æргом зæдхт цæуы ацы фарстамæ. Бирæ рæвдауæндæттæ æмæ скъолатæ ифтонг сты нырыккондæр техникон гæнæнтæй
Сывæллоны æдасдзинад фыццаджыдæр. Цæгат Ирыстоны ахуыргæнæндæтты стыр æргом здæхт цæуы ацы фарстамæ. Бирæ рæвдауæндæттæ æмæ скъолатæ ифтонг сты нырыккондæр техникон гæнæнтæй. Сæрмагонд хъусынгæнинаг информаци æрвыст цæуы ныййарджыты телефонтæм æмæ электрон почтæмæ. Уыимæ ис онлайн бастдзинад дæр. Бæлвырддæр радзурдзæн Сосранты Жаннæ.
Бæрзонд быру, цæстдарæн видеокамерæ, уæдæ хуымæтæгæй дæр рæвдауæндоны мидæмæ никæй бауадздзысты. Бæстыхайы дæр æвæрд сты видеокамерæтæ. Цы дзы цæуы, уымæ онлайн-бастдзинады фæрцы кæсынц канд рæвдауæндоны кусджытæ нæ, фæлæ ма барадон оргæнтæ дæр.Зæгъæм сывæллонмæ ныййарæджы бон куы нæ уа æрбацæуын, уæд хъомылгæнæгæн ис сæрмагонд хæслæвæрд.Рæвдауæндоны хъомылгæнинæгтæ æмæ хъомылгæнджытимæ æдзухдæр цæуы профилактикон ныхас, уымæ гæсгæ бахъуаджы сахат зонынц, кæцы кънопкæйыл хъæуы ныххæцын, уый.
Дзæуджыхъæуы скъолаты дæр æдасдзинады фарста у ахсджиаг. Мидæмæ хизгæйæ сæрмагонд кусæнгарзыл скъоладзау андзæвын кæны йæ картæ, уыцы рæстæг хъахъхъæнæджы экраныл ссудзы бæрæггæнæн нысан.
Сывæллон цал хатты бацыд æмæ рацыд, æппæт уыцы информаци æвдыст цæуы ныййарæджы телефоны, кæнæ та йæм æрбацæуы электрон почтæмæ.
Ахуыргæнæн кусæнуæттæ фылдæр хатт бадзырд сфидар кæнынц, хъахъхъæнæн куыстуат кæмæ ис, ахæм адæмимæ. Сывæллоны æдасдзинад – ныййарджыты ахсджиаг фарста у, æмæ йæм куыдфæндыйы цæстæй кæсæн нæй.
