Зындгонд ирон поэт-зарæггæнæг Чеджемты Æхсары номарæн дыккæгæм республикон конкурс «Стъалыты æхсæрдзæн»-ы дыккаг тур уыд Тæбæхсæуты Балойы номыл ирон академион театры. Конкурс арæзт æрцыд дыккаг хатт.
Литературон-музыкалон конкурс «Стъалыты æхсæрдзæн»-ы архайдтой фыццаг туры уæлахиздзаутæ. Жюрийы уæнгтæ сæ сбæрæг кодтой цалдæр боны размæ. 7 азæй 30 азы онг кæуыл цæуы, ахæм чызджытæ æмæ лæппутæ сæ иузæрдиондзинад равдыстой мадæлон æвзагмæ, сæрмагондæй та Чеджемты Æхсары сфæлдыстадмæ. Уыдон аив кастысты Æхсары æмæ æндæр авторты æмдзæвгæтæ. Уæлдай тынгдæр та сæ разæнгард кодта жюрийы тæрхонмæ сæхи фыст æмдзæвгæтæ кæй рахастой, уый. Залы хъуыстысты номдзыд поэты фыст зарджытæ. Проекты автор у зарæггæнæг Сечъынаты Альбинæ, бакуыста йыл республикæйы ахуырады æмæ наукæйы министрады æххуысæй. Конкурс арæзт у æртæ номинацийæ: æмдзæвгæ аив кæсын, фыццаг къахдзæфтæ ирон поэзийы æмæ æрыгон зарæггæнджытæ. Иууылдæр сæхи равдыстой хорзæй. Уæлахиздзатæ хорзæхгонд æрцыдысты сæрмагонд лæвæрттæй. Ахæм конкурсты фæрцы рæзгæ фæлтæр зондзысты æмæ æмбæлгæ аргъ кæндзысты Ирыстоны номдзыд поэты сфæлдыстадæн. Чеджемты Æхсары æмдзæвгæтæ та сæ удварны хъæздыгдзинадæн уыдзысты стыр ахъаз.
