Тæрхондæтты пъырыстыфты федералон службæйы цæгатирыстойнаг хайады кусджытæ 15 вьетнамаджы арвыстой сæ Райгуырæн бæстæмæ, Уæрæсейы æнæ регистацийæ цас æмбæлы,
Цалдæр сахаты фæстæ Вьетнамы цæрæг Нгун Ван Шак æрвыст æрцæудзæн йæ райгуырæн бæстæмæ. Ам фæцис иу азы бæрц, уыдонæй закъонмæ гæсгæ æрмæстдæр æртæ мæйы. Куыста арæзтадон объекты, зæгъы мигрант.
Нгун Ван Шак, Вьетнамы республикæйы гражданин: «Æз Вьетнамы цæрын. Ардæм кусынмæ æрцыдтæн. Нæхимæ нын æхца тынг гыццыл фидынц. Стæй дзы куыст дæр уыйас нæй».
Фыццаджыдæр фæсарæнты цæрджытæ Уæрæсемæ æрбацæуынц æхца бакусынмæ. Скæнынц туристон визæ æмæ уæд закъонмæ гæсгæ сæ бон у нæ бæстæйы 3 мæйы цæрын. Ахæм, фæллойы визæйæ æнцондæр райсæн у. Республикæйы закъонмæ гæсгæ чи нæй, уыцы фæсарæйнæгты бæлвырд кæны миграцион службæ æмæ мидхъуыддæгты министрады кусджытæ. Тæрхондæтты пъырыстыфтæ та сæ æрбаласынц рæстæгмæйы сæрмагонд центрмæ. Уый фæстæ тæрхондоны рахæссынц уынаффæ, цæмæй æрцæуой депортацигонд. Уыцы тæрхонмæ ногæй æркæсын кæнын сæ бон у 10 боны дæргъы.
Вьетнамы æртæ цæрæджы уал æрвыст æрцыдысты ивгъуыд къуыри. Ацы хатт та тæрхондæтты пъырыстыфтæ сæ райгуырæн бæстæмæ арвыстой 12 адæймаджы, семæ пъырстыфты сæрмагонд къорды специалисттæ. Аласдзысты уал сæ Мæскуымæ, стæй уæд уырдыгæй та Вьетнаммæ. Уыцы хъуыддагæн бæстæйы бюджетæй дихгонд æрцыд 800 мин сомы. Ныр сын фæстæмæ Уæрæсемæ ссæуыны бар уыдзæн æрмæстдæр 5 азы фæстæ.
Гугкаты Иринæ
