Республикæйы æхсæнадон палатæ сси æппæтадæмон гуманитарон акцийы координатор.
Таджикистаны скъоладзаутæ ног ахуыры азмæ райсдзысты чингуытæ уырыссаг æвзагæй, стæй уырыссаг класиикты аивадон уацмыстæ.
Республикæйы æхсæнадон палатæ сси æппæтадæмон гуманитарон акцийы координатор. Ахуыргæнæн чингуытæ æмæ аивадон литературæ арвитдзысты Таджикистаны Горно-Бадахсанскы ахуырдзаутæн. Ахæм æххуысы курдиатимæ Цæгат Ирыстоны æхсæнадон палатæмæ фæсидт таджикæгты диаспорæ «Памир»-ы разамонæг Арсен Худододов. Уæ зæрдыл уын æрлæууын кæндзыстæм, 2014-æм азы нæ республикæйы разамынд æмæ Таджикистаны Горно-Бадахшанскы хсæн фыст æрцыд æмгуыстады бадзырд. Йæ фæлгæты та арæзт æрцыд чингуыты акци. Хъæуы, цæмæй таджикаг сывæллæттæ хуыздæр зоной уырыссаг æвзаг. Ныронг уал арвыстой гуманитарон æххуысæй чингуыты 525 килограммы. Æрæджы æхсæнадон палатæйы сæрдар Нина Чиплакова фæсидт республикæйы библиотекæты разамонджытæм, цæмæй уыдон дæр архайой ацы акцийы. Республикæйы ахуырад æмæ наукæйы министрад дæр бахаста йе вæрæн, æмæ радта 3500 ахуыргæнæн чиныджы. Уæвгæ ацы акцийы архайынæн фадат ис, кæй фæнды, уыдонæн се ппæтæн дæр. Чингуытæ æрбахæссæн ис æхсæнадон палатæйы бæстыхаймæ Пушкинскийы уынджы 10-æм хæдзары 2-æм корпусмæ.
