Театрдзауты зæрдæтæ барухс кодта уацмысы сюжет æмæ англисаг юмор
Тæбæхсæуты Балойы номыл Ирон академион театры ацыд бритайнаг драматург Рей Кунийы комеди «Он, она, окно, покойник» – мæ гæсгæ премьерæ. Театрдзауты зæрдæтæ барухс кодта уацмысы сюжет æмæ англисаг юмор.
Æхсæнады сæрмагонд бынат чи ахсы, ахæм нæлгоймаг, англисаг парламенты уæнг сфæнд кодта йæ изæр 5 стъалыйон отелы йæ политикон ныхмæлæууæджы æххуысгæнæг сылгоймагимæ арвитын. Бритайнаг драматург Рей Кунийы уацмысмæ гæсгæ спектакль æвæрæг у режиссер Челæхсаты Эдуард. Сæйраг хъайтар Джордж Пигден æнцонæй сарæхсы цавæрфæнды зын уавæртимæ дæр. Уыцы ролыл бакуыста Токаты Зауырбег. Актер сарæзта, йе *нæхин уды тыххæй спектаклы кæрон бирæ хæрзтæ кæмæ *нхъæлмæ кæсынц, ахæм сыгъдæгзæрдæ адæймаджы сурæт.
Царды *рцæуæн кæмæн ис, бирæ ахæм æнæхъæлæджы цаутæ иу изæрмæ бавзæрста уæздан, бинонтæ кæмæн ис, ахæм нæлгоймаг. Автор алыхуызон къуылымпыдзинæдтæ хъайтартæн аразгæйæ, арæхстджынæй аиуварс кæны, срастгæнæн кæмæн нæй, уыцы хъуыддæгтæ. Уацмыс æххæст у комедийы миниуджытæй – динамикон сюжетæй, юморæй æмæ уæлæнгай æнкъарæнтæй. Архайд отелы иунæг уаты кæд цæуы, уæддæр пьесæ у цымыдисаг.
Актерты труппæ арæзт уыд 9 адæймагæй. Премьерæмæ цæттæ кæнын райдыдтой февралы. Режиссер Челæхсаты Эдуард куыд фæнысан кодта, уымæ гæсгæ спектакль театрдзаутæн ратдзæн фадат зæрдиагæй ахудынæн, сæ фæллад хъæлдзæгæй суадзынæн.
Премьерон равдыст рауад æнтыстджын. Театрдзаутæ йæм æхсызгонæй бакастысты. Спектакль хаст æрцæудзæн театры репертуармæ, аивад уарзджытæн æй фенæн уыдзæн иннæ театралон сезонты дæр.
