Журналистты фæрстытæн дзуæппытæ лæвæрдтой аивадон разамонæг Уалыты Гиви æмæ директор Дудайты Чермен
Тæбæхсæуты Балойы номыл паддзахадон академион театры уыд стыр пресс-конференци. Журналистты фæрстытæн дзуæппытæ лæвæрдтой аивадон разамонæг Уалыты Гиви æмæ директор Дудайты Чермен. Æрныхас кодтой ахсджиаг фарстатыл – театры бæстыхай цалцæггæнинаг кæй у, ууыл, ног репертуарыл æмæ æндæртыл. Бæлвырддæр радзурдзæн Хъайтмазты Дзерассæ.
Ирон театр цæттæ кæны стыр реставрацимæ. Уый тыххæй пресс-конференцийы фехъусын кодта аивадон разамонæг Уалыты Гиви. Бæстыхай хауы культурон намысы цыртдзæвæнты реестрмæ. У базилинаг. Базæронд сты инженерон коммуникацитæ, бындурон цалцæггæнинаг у сценикон механикæ. Специалисттæ ма зæгъынц, кæй хъæуынц ног проектон уынаффæтæ бæстыхайы историон бакаст бахъахъхъæнынæн. Реконструкцийы размæ хъæуы алыг кæнын ахсджиаг фарста – труппæ кæм кусдзæн, уый. Рацарæзт гæнæн ис, æмæ ахæсса 3 азы онг, æмæ уыцы рæстæгмæ къорды бахъæудзæн ног сценæ.
Ног сезоны афишæйы рæхджы фæзындзæн цалдæр премьерæйы: Черчесты Георгийы романмæ гæсгæ спектакль «Фæдзæст», Пушкины «Чысыл трагедитæ», Робер Томайы «Аст уарзæгой сылгоймаджы». Театры разамынды ныхæстæм гæсгæ, аивадуарзджытæм æнхъæлмæ кæсынц куыд классикон, афтæ ног сценикон интерпретацитæ дæр.
Театр ахадгæйæ кусы æрыгон фæлтæримæ дæр. Ам архайы сывæллæтты студи, йæ иуæй-иу хъомылгæнинæгтæ ныридæгæн рацæуынц стыр сценæмæ æмæ сæххæст кæнынц сæйраг рольтæ. Дарддæр кусдзæн «Гом сценæ»-йы фæз дæр. Фæстаг 5 азмæ театры хи æфтиæгтæ сырæзтысты 8 хатты. Уымæй фæстæмæ ма, Ирон театр «Пушкины картæ»-йы программæйы хатдзæгтæм гæсгæ сси Уæрæсейы культурæйы министрады премийы лауреат «Хуыздæр регионалон театр»-ы номинацийы.
Пресс-конференцийы дзырдтой фестиваль «Вахтангов. Путь домой»-ыл дæр. Ирон театры актертæ дзы традицимæ гæсгæ архайдзысты. Уалыты Гивийы ныхæстæм гæсгæ, сфæлдыстадон къорды царды ахсджиаг хай сты гастрольтæ. Майы труппæ абалц кæндзæн Симферопольмæ, сæрды та архайдзæн проект «Стыр гастрольты».
