Фæлæ бирæ шофыртæ нæ тагъд кæнынц йе `ххæст кæнынмæ. Цæгат Ирыстоны сæрмагонд бардæттæг гæххæттытæ ис æрмæстдæр 450 таксистмæ.
Пенсиисæг Алыккаты Хазби таксийы кусы 6 мæйы. Фыццаджыдæр, йæ размæ сæвæрдта, закъонмæ гæсгæ архайыны хæс. Куыд зæгъы, афтæмæй уый зын хъуыддаг нæу. Ис æм бардæттæг гæххæтт, йæ машинæ дæр, закъонмæ гæсгæ цы æмбæлы, уыцы сæрмагонд нысантæй æххæст у.
Алыккаты Хазби, таксийы шофыр: «Июнæй фæстæмæ куыстой фирмæйы. Ныр та кусын куыд сæрмагонд амалхъом адæймаг. Пенсиисæг дæн, æмæ мæ бон кусын у, фæлæ пенсиисджыты никуыдæм исынц. Махмæ ис сæрмагонд гæххæттытæ, алцы дæр нæм ис. Фæлæ ма Кировы уынгмæ æркæсут. Машинæ кæм æрлæууын кæнай, уый дзы нæй. Сты сæ фылдæр сты губкæтимæ, тряпкæтимæ».
Такситы тыххæй закъон йæ тыхы бацыд фарон январы. Фæлæ цæгатирыстойнаг шофыртæй бирæтæ ныр дæр нæма кусынц ног æгъдæуттæм гæсгæ. Уыимæ закъоны сæрты ахизынæн æрхъуыды кæнынц ног фадæттæ.
Фæстаг рæстæг дуканиты фылдæр æлхæнын райдыдтой мæнæ ахæм губкæтæ, арæхдæр та буртæ. Уый уымæн, æмæ сæ такситы шофыртæ сæ машинæты пайда кæнынц сæрмагонд нысанты бæсты.
Паддзахадон автоинспекцийы кусджытæ куы фæзынынц, уæд бирæ машинæты сæртæй шашкæтæ уайтагъд цыдæр фæвæййынц. Фæндаггон пъæлицæйæгтæ фарон рабæрæг кодтой 130 закъонхалæгæй фылдæры, ацы аз уал æрмæстдæр дыууæйы.
Дзуццаты Артур, фæндæгтыл æдасæй цæуыны паддзахадон инспекцийы административон закъонæвæрынады полчъы инспектор: «Фарон административон кодексмæ хаст æрцыд ивддзинæдтæ. Уыдонмæ гæсгæ такситы кусджытн бар нал ис æнæ гæххæттытæй цæуын æмæ пассажирты ласын. Æппæт гæххæттытæ кæмæ нæй, уыдонæн нæ инспектортæ фыссынц протоколтæ æмæ сæ æрвитынц тæрхондонмæ».
Цæгат Ирыстоны 10 таксистæй бардæттæг гæххæтт вæййы æрмæстдæр иумæ. Абон сæрмагонд документтæ ис 450 шофырмæ. Промышленносты, транспорты æмæ энергетикæйы министрады куыд зæгъынц, афтæмæй иннæ регионты ахæм бардæттæг гæххæттытæ кæмæ ис, уыдоны нымæц у дзæвгар фылдæр.
Хъайтмазты Дзерассæ
