Кæд сæ кусæнгæрзтæ нырыккон сты, уæддæр пайда кæнынц рагон технологитæй
Дала-фæндыр, уадындз, хъисын фæндыр… Тарскæйы 1-æгæм скъолайы ахуырдзаутæ сæхæдæг аразынц национ инструменттæ. Кæд сæ кусæнгæрзтæ нырыккон сты, уæддæр пайда кæнынц рагон технологитæй. Уымæ гæсгæ инструменттæ зæлынц сæ раздæры хуызы. Уæвгæ, рагон ирон инструментты æрмадз скъолайы байгом кодта фæллойы урокты ахуыргæнæг Деметы Зауыр. Сфæлдыстадон фæсивæды тыххæй бæлвырддæр радзурдзæн Фидараты Маринæ.
Удæгас мелоди, рагон инструменты зæлтæй. Канд сфæлдыстадон фæллойы ирд æвдисæн нæу. Иу хъуыддаг у – ахæм инструментыл цæгъдын, иннæмæй та йæ хи къухтæй саразын. Фарон Тарскæйы 1-æм скъолайы байгом адæмон инструментты æрмадз. Йæ саразыны хъæппæрис разынд фæллойы урокты ахуыргæнæг Деметы Зауырмæ. Ацы къорд æвæстиатæй йæхимæ æрбангом кодта рæзгæ фæлтæры. Ныртæккæ дзы сæ дæсныйадыл æфтауынц 30 скъоладзауы.
Дала-фæндыр, хъисын-фæндыр, уадындз… Æппæт музыкалон инструменттæ арæзт цæуынц рагон технологитæм гæсгæ. Зæгъæм сæ хæйттæ скæнынц хъæдæй, æмæ сæ бафидар кæнынц æндадзæнæй. Ам ахсджиаг у хъæдæрмæджы хуыз. Ныртæккæ мастертæ фылдæр пайда кæнынц заз бæласæй æмæ тæгæрæй. Дзæгъойты Миланæ музыкалон ахуыртæм цæуы сабибонтæй фæстæмæ. Цæгъды ирон æмæ хъисын фæндырыл. Ныртæккæ та цымыдисæй зонгæ кæны дала-фæндыры сусæгдзинæдтимæ.
Иу къахдзæф иннæйы фæдыл, æмæ æрмадзы фæзынд ансамбль «Фарн». Ныридæгæн рамбылдта кадджын республикон конкурс «Иудзинад»-ы. Дарддæр та нысан кæнынц уæрæсейаг æмæ æппæтадæмон конкурсты архайын. Деметы Зауыры сæйраг бæллиц та у, цæмæй æвзонг музыканттæ фидæны дарддæр ахæццæ кæной сæ ахуыргæнæджы хъуыддаг, æмæ бахъахъхъæной национ традицитæ.
