Валерийæн баззад бинойнаг æмæ 2 сывæллоны, хистæр фыртæн хъæуы операци скæнын кардиостимулятор баивынæн
Нæ программæйы хъайтар у Тебиаты Валерий. Йæ фæсном «Цæлык». Гыццыл хъæуæй ацыд фронтмæ, æнтыстджынæй хъахъхъæдта бæстæйы кад. Хъыгагæн, Авдеевкæйы бын тохы йæ цард аскъуыд. Валерийæн баззад бинойнаг æмæ 2 сывæллоны. Хистæр фыртæн хъæуы операци скæнын кардиостимулятор баивынæн. Фæллойы æмæ социалон рæзты министрады бинонты уавæры тыххæй зонынц. Куыд загътой, афтæмæй сывæллонæн медицинон æххуыс бакæныны фарста лыггонд цæуы. Цы æххуысы гæнæнтæ æмбæлы, уыдон та сæ тыхы бацæудзысты, куыд æмбæлы, афтæ. Бæлвырддæр хабæрттæ радзурдзæн Хъайтмазты Дзерассæ.
Тохы быдыры йæ цæф æмбалы рацæйхæсгæйæ, Тебиаты Валерий хъæбатырæй фæмард украинаг дроны атакæйы рæстæг Авдеевкæйы бын. Уыцы æфсæддон хæс Валерийæн сси фæстаг. Украинаг боевикты къæппæджы бахаугæйæ ма аскъуыд иу хъæбатыр æфсæддоны цард. Зæрдæхæлар адæймаг, æхсарджын æмæ ныфсхаст хæстон, дæнцæгæнæрхæссинаг цардæмбал æмæ хорз фыд. Кæстæр Сæрмæтыл мæй дæр нæма цыд, афтæмæй Валерий йæхицæн фидар уынаффæ рахаста.
Бархион отряды хыгъды Тебиаты Валерий ард бахордта Фыдыбæстæйæн иузæрдиондзинады тыххæй. Æцæг патриот уæвгæйæ, йæ бæллиц уыд райгуырæн хъæуы кад уæлдæр кæнын, тохы быдыры сгуыхтдзинадтæ æвдисгæйæ.
Хиуæттæ мысынц, дард уæвгæйæ дæр алкæуылдæр мæт кодта. Телефонæй-иу куы дзырдта, уæд йæхи æмæ йæ хæстон бонты кой нæ кодта. Æрмæстдæр фидæнмæ нысанты тыххæй. Бинонты фæндыд хи хæдзар балхæнын, æмæ йе *нæниздзинад цудыд кæмæн у, сæ уыцы хъæбулы йæ къæхтыл слæууын кæнын.
Сосланыл 3 азы дæр нæма цæуы. Фæлæ ныридæгæн у йæ фыды хуызæн, куыд йæ уындæй, афтæ йæ уды кондæй дæр. Йæ мад куыд зæгъы, афтæмæй фæстаг рæстæг сывæллоны уавæр февзæрдæр.
Фыццаг операци скодтой, сывæллоныл афæдз куы сæххæст, уæд Астраханы кардиоцентры. Бинонтæн уæд баххуыс кодта æнæниздзинадхъахъхъæнынады министрад, стæй хæрзаудæн фонд «Быть добру». Валерий лæппуйы йæхæдæг ласта дзæбæх кæнынмæ æмæ ныр дæр, йæ контракт куы фæуыдаид, уый фæстæ хъавыд сывæллоны æнæниздзинады куыст бакæнын. Фæлæ нæ бантыст.
Дарддæр та баххуыс кæндзæн паддзахад. Ахæм фарстаты алкæмæдæр сæрмагонд цæстдард у хицауадон оргæнты раззагдæр нысантæй иу. Алы бинонтæм дæр республикæйы фæллойы æмæ соцаилон рæзты министрадæй цæуы бæстон цæстдард.
Министр аныхас кодта Лалыты Кристинæимæ. Ратæфæрфæс ын кодта æмæ зæрдæ бавæрдта алывæрсыг æххуысæй.
Æмæ æндæрхуызон гæнæн нæй. Ахæм аудындзинад райсын у, Фыдыбæстæйы хæдбардзинад чи хъахъхъæны, алы уыцы хæстоны бинонты бон дæр, загътой фонд «Фыдыбæстæ хъахъхъæнджыты» регионалон хайады дæр.
Хæрзаудæн фонд «Быть добру» раздæр бинонтæн радта портативон аппарат æмæ сæрмагонд тест-фæрæзтæ. Чысыл Сосланы уавæрмæ, медицинон кусæнуаттæм ма цæугæйæ, цæст дарын – мадæн стыр æнцойдзинад у. Ныр дæр, фонды зæрдæ бавæрдтой, операци кæнынмæ фæндаггаджы хæрдзты хай сæхимæ райсынмæ цæттæ кæй сты.
Фыдыбæстæ хъахъхъæнджыты дæр хъæуы æххуыс. Социалон. Æмæ ахсджиаг у, æххуысгæнджытæ сæ фарсмæ кæй сты, уый. Абон паддзахадон æххуысы гæнæнтæ парахат сты. Æмæ ныхас цæуы, æрмæст закъонмæ гæсгæ цы фиддонтæ æмбæлы, уыдоныл нæ.
