Комкоммæ ныхасы рæстæг адæм республикæйы разамонæгæй ракуырдтой, цæмæй сын сæ бирæазон фарста алыг кæной
Тельмæны уынджы хæдзæрттæй иуы цæрджытæ сæ курдиат бахастой Сергей Меняйломæ. Комкоммæ ныхасы рæстæг адæм республикæйы разамонæгæй ракуырдтой, цæмæй сын сæ бирæазон фарста алыг кæной. Бæлвырддæр та сæ кæлæддзаг хæдзарæй ногмæ раивой. Уымæн æмæ хæдзар хаст æрцыд федералон программæмæ. Адæм сæ Ног азы бæрæгбон ног фатерты сбæрæг кæндзысты, æви нæ, уый тыххæй базыдта Гуытъиаты Алинæ.
Дзæуджыхъæуы Тельмæны уынджы 24-æм хæдзары цæрджытæ æппынæдзухдæр кæнынц цалцæггæнæн куыстытæ. Бæстыхайы æддаг бакастæй дæр æмæ мидæгæй дæр бæрæг дарынц зыхъхъыртимæ къултæ. Уымæй дарддæр уымæл æмæ тæдзгæ сæр. Давид Хазарянц ам цæры æхсай азæй фылдæр. Куыд зæгъы, афтæмæй ахæм уавæрты цæрæн нæй.
Цæрджытæн зæрдæ бавæрдтой, федералон программæмæ гæсгæ сæ ног хæдзæрттæм кæй раивдзысты, уымæй. Ныридæгæн фатерты хицæутты иу хай æрцарди Весеннийы уынджы ног хæдзары. Иннæтæ та æнхъæлмæ кæсынц сæ радмæ.
Ацы аз 30 адæймагæн сæ бон уыдзæн сæ ног фатерты æртыгай чъиритæ скувын. Уый тыххæй фехъусын кодтой цæрæнуæтты-коммуналон хæдзарады, артаджы æмæ энергетикæйы министрады. Ног арæзтад дзуапп дæтдзæн нырыккон домæнтæн.
Æдæппæтæй дыууæ мины дыууын дыккæгæм азы нæ республикæйы эксплуатацийы ратдзысты дыууæ сæдæ æртын цыппар фатеры. Уый къухы бафтдзæн, федералон программæ «Цæрæнуæттæ уæрæсейаг бинонтæн» æххæст кæнгæйæ. Йæ архайджыты хыгъд кæны фылдæр. Уый тыххæй та адæм сæ курдиæттæ æрвитынц сæрмагонд къамистæм. Арæзт сты сæ куысты бынæтты цур, кæнæ та бынæттон администрациты хайæдты.
