Ног азыл ног фæндтæ æмæ нысантимæ сæмбæлдысты Æрæфы районы цæрджытæ дæр. Къорд рæстæг уæззау уавæры чи уыд, уыцы районы фæзынд ногдзинæдтæ.
Толдзгуыны скъолайы иу хай арæзт æрцыд 1926-æм азы, иннæ та йыл бафтыдтой 1986-æм азы. Уæдæй абонмæ сæ иу дæр бындуронай цалцæггонд нæ уыд. Фыдæбæттæ кæнгæйæ ахуыргæнджытæ сæхæдæг алы ног ахуыры азмæ дæр цæттæ кодтой скъола. Йæ директор Тагъаты Индирæ куыд зæгъы, афтæмæй 14 азмæ скъоламæ районы хицауадæй æрбацæугæ никæйы федта. Сывæллæтты уавæртæ фæхуыздæр кæныны фæнд никуы ничи скодта. Ныр сæ цинæн кæрон нæй.
Тагъаты Индирæ, Толдзгуыны скъолайы директор: «Раст куы зæгъон, уæд скъолайы раздæры директортæ дæр куырдиæттимæ цыдысты хицауадмæ, фæлæ сæ хъусæг нæ уыд. Æз мæхæдæг скъолайы сæргъы куы æрлæуыдтæн, уæд æй бамбæрстон, куыд зын у фарстайæн дзуапп ссарын, уый. Не *рбахизæны дуæрттæ нал бæззыдысты. Æнхъæлмæ кæсынæн нын рæстæг нæ уыд æмæ сæ нæхи фæрæзтæй балхæдтам. Æппæт районы скъолаты директортæ дæр ног сæргълæууæг Бекмæрзты Валерийæ тынг разы сты».
Скъолайы къултæ ныр дæр нæма бахус сты, алы къæвдайы уынджы куыд уарыд, мидæгæй дæр афтæ. Уæдæ ма залмæ искуы бацæудзысты, ууыл хъуыды дæр нал кодтой. Ныр бындурон цалцæджы фæстæ суыдзæн æрмæст скъоламæ цæуæг сывæллæтты ирхæфсæн бынат нæ, фæлæ хъæуы æхсæнадон хуыздæр бынат. Ахуырдзаутæн ма, нырыккон ахуырады домæнтæм гæсгæ, арæзт æрцыд скъолайы хуылфы уазæгдонтæ.
Хъодзаты Эльвирæ, Толдзгуыны скъолайы ахуырдзау: «Раздæр зивæг кодтон скъоламæ цæуынмæ, ныр та хъæлдзæгæй фæцæуын».
Ахуырады федералон программæмæ гæсгæ Толдзгуыны скъолайы пайда кæнынц интерактивон фæйнæджытæй æмæ æндæр нырыккон кусæнгæрзтæй. Æлхæд сын æрцыд, физкультурæйы урокты цы дзаумæттæ хъæуы, уыдон.
Хъуылцыты Светланæ, Толдзгуыны скъолайы директоры хæдивæг: «Радтой нын спортивон инвентарь 100 мин сомы аргъ. Ныр сывæлæттæ æххæст сты æппæт хъæугæ дзаумæттæй дæр».
Ныртæккæ се стырдæр бæллиц у, спортивон залы уавæр куы фæхуыздæр уаид, уый. Рудзгуытæ æмæ уал дзы хъармгæнæнтæ ивд æрцыдысты.
Бекмæрзты Валерий, Æрæфы районы сæргълæууæг: «Скъолатæ хорз уавæры нæ уыдысты. Бакуыстам сыл, фæлæ ма ис бакусинæгтæ. Стыр æххуыс нын кæнынц республикæйы хицауады сæрдар Такъоты Сергей, йæ хæдивджытæ Таболты Сергей æмæ Зæнгионты Виталий. Нæ районы ахуырады къабазмæ æдзухдæр сæ цæст дарынц республикæйы ахуырады министр Огъуаты Алан æмæ йæ фыццаг хæдивæг Хъазахты Тиминæ».
Ныр Толдзгуыны скъолайæн æрмæст йæ бакастæй дæр зæрдæ райы.
Сосранты Жаннæ
