Къамисы уæнгтæ æрдзырдтой фæндæгты уавæрыл æмæ фæндаггон-транспортон цауты профилактикæйы ахадгæ мадзæлттыл
Республикæйы Хицауады сæрдары хæдивæг Томайты Ирбег разамынд лæвæрдта фæндаггон змæлды æдасдзинады фæдыл хицауадон къамисы радон æмбырдæн. Къамисы уæнгтæ æрдзырдтой фæндæгты уавæрыл æмæ фæндаггон-транспортон цауты профилактикæйы ахадгæ мадзæлттыл. Се ргом аздæхтой ахуыргæнæндæтты алыварс уынгты-фæндаггон хызты аипдзинæдтæм, стæй скъолаты автобусты техникон уавæрмæ. Томайты Ирбег куыд фæбæрæг кодта, афтæмæй ацы азы 7 мæймæ хыгъд æрцыди 452 фæндаггон цауы, хъыгдард дзы баййæфтой 638 адæймаджы, 32-йæ фæмард сты. Æмбырды архайджытæ Дзæуджыхъæуы снысан кодтой, фæндæгты уæлцъар аивын кæм хъæуы, ахæм объекттæ. Вице-премьер курдиат арвыста Дзæуджыхъæуы разамындмæ, цæмæй паддзахадон автоинспекциимæ иумæ аргъ скæной уавæрæн, цæмæй машинæты фæндæгтæ домæнтæн дзуапп дæттой. Ацы хъуыддаг фылдæр хауы транзитон уæзласæн транспорт кæуылты цæуы, уыцы фæндæгтæм, стæй фистæгæйцæуджыты ахизæнтæм. Томайты Ирбег бадомдта, цæмæй ног ахуыры азы агъоммæ сбæрæг кæной æмæ базилой скъолаты æмæ рæвдауæндæтты цур фæндаггон нысантæм. Ахуырады æмæ наукæйы министрадæн та бахæс кодтой, астоинспекциимæ бацæттæ кæнын сæрмагонд пълан æмæ æдасдзинады фæтк пропагандæ кæнын.
