Йæ номыл футболæй турнир æрæмбырд кодта 6 командæйы
Троицкæйы ацыдысты сæ зындгонд æмзæххон, æфсæддон разамонæг, Советон Цæдисы хъæбатыр Никита Дроновы райгуырды 125 азимæ баст номарæн мадзæлттæ. Йæ номыл футболæй турнир æрæмбырд кодта 6 командæйы. Уый, Мæздæджы, Павлодольскæйы, Винограднæйы минæвæрттæ. Стæй, кæй зæгъын æй хъæуы, Троицæйы фæсивæд. Спортивон ерыстæм æдзух се вæрæн бахæссынц Советон Цæдисы хъæбатыры хæстæджытæ дæр, турнир саразынæн скæнынц æппæт фадæттæ, фæсивæдæн баласынц хойраг, скæнынц сын призты фонд. Ацы аз юбилейон мадзæлттæ саразынæн баххуыс кодтой «Хæстон æфсымæрад»-ы уæнгтæ дæр. Алы командæ дæр тох кодта уæлахизыл. Ацы аз хуыздæртыл нымад æрцыдысты Винограднæйы æвзонг футболисттæ. Дыккаг бынаты аккаг сси Троицкæйы скъола, æртыккæгтæ та – Мæздæджы скъола-интернаты лæппутæ. Уæлахиздзаутæ хорзæхгонд æрцыдысты майдантæй æмæ кубоктæй.
