филиал вгтрк государственная телерадиовещательная компания “Алания”

Ахсджиаг цау республикæйы æнæниздзинадхъахъхъæнынады къабазы. Цæгат Ирыстонмæ æрбаластой нырыккон магнитон-резонансон томограф. Ацы хъуыддаг бантыст, Федерацийы Советы уæнг Хацъæты Олег æмæ хæрзаудæн фонд «Аивад, наукæ æмæ спорт»-ы разамонæг Алишер Усмановы иумæйаг бадзырдмæ гæсгæ. Зынаргъ аппарат республикæ райста лæвар. Цæмæй томограф адæмæн лæггад кæнын райдайа, уымæн ма бирæ мадзæлттæ хъæуы. Зæгъын хъæуы уый, æмæ йын сæрмагонд бæстыхай арæзт æрцыд 2 къуыримæ Рахизфарсы районы рынчындоны кæрты. Скодта йæ куыстуат «Спецтепломонтаж», йæ разамонæг Дзебысаты Майрæм, архитектор Болиаты Русланы проектмæ гæсгæ. Ныртæккæ уал томограф специалисттæ кæндзысты æмбырд, кæронмæ сфæлгонц кæндзысты бæстыхай дæр. Уыцы иу рæстæг цалдæр дохтыры æрвыст æрцæудзысты ахуырмæ, цæмæй арæхсой ахæм кусæнгæрзтыл архайынмæ. Хацъæты Олег куыд бафиппайдта, афтæмæй ам томографи республикæйы цæрджытæн кæндзысты лæвар, хъæудзæн сæ æрмæстдæр дохтыры амынд. Ацы хъуыддагыл чи бацархайдта, уыдон зæрдæ дарынц, хорзырдæм кæй фæзындзæн адæмы дзæбæх кæныныл.
 
Хацъæты Олег, УФ-йы Федерацийы Советы уæнг: «Хъыгагæн, Ирыстоны цæрджытæй томографæй кæмæ æркæсын хъæуы, уыдон фылдæр сты нæ гæнæнтæй, æмæ уымæ гæсгæ, ахæм уынаффæ рахастам, иу томограф ма къухы куы бафтид, зæгъгæ. Æмæ абон æлхæд æрцыд, ныртæккæ йæ исæм. Парижæй йæ рарвыстой, ам йын ног бынат сарæзтам. Фыццаджыдæр, фæнды арфæйы ныхæстæ зæгъын Парламенты депутат Дзебысаты Майрæмæн. Курдиатимæ йæм бацыдтæн, æмæ йын æхца дæр нæ бафыстам, домгæ дæр нæ ницы бакодта, æмæ 2 къуыримæ скодта ацы бæстыхай. Хуыцауы фæрцы, ацы кусæнгæрзтæ æвæрд æрцæудзысты».