Сты 5 адæймаджы. Æрцахстой сæ Мæскуыйы бынмæ, гуырысхо сыл кæнынц 25 адæймаджы амарынæй. Знон Ленины районы тæрхондон рахаста ахæстоны сæ дарыны уынаффæ.
Дзæуджыхъæумæ схæццæ кодтой фыдракæндтыл дзурæг æвдисæнтæ дæр. Сæрмагонд операцийы рæстæг æдасдзинады федералон службæйы, мидхъуыддæгты министрады æмæ слестгæнæн комитеты кусджыты æмархайды фæрцы фыдгæнджытæм ссардæуыд – 27 автоматы, 22 дамбацайы, æхст мынæггæнæнтæ, гранаттæ æмæ 7 минæй фылдæр хæстон æрмæджытæ. Уыдонæй уæлдай ма сæм разынд хиконд рæмудзæн æрмæджытæ, хæсгæ радиостанцæтæ, стæй автоинспекцийы æмæ æндæр барадон оргæнты уæлæдарæсы 50 комплектæй фылдæр.
Уæ зæрдыл уын æрлæууын кæндзыстæм, 2007 азы фыдгæнджыты къорд сарæзта æмæ йæ сæргъы лæууыд Гуырдзыстонæй ралидзæг Гæджиты Аслан. Къорды уыди 30 адæймагæй фылдæр.
Фыдгæнджытæ цыбыр рæстæгмæ амардтой Дзæуджыхъæуы мэр Хъараты Виталийы æмæ Пагæты Хъазыбеджы, организацигонд фыдракæнтты ныхмæ кусæг управленийы хицау Мецъаты Маркы, бынæттон уголовон агуырды разамонæг Челдыты Виталийы æмæ йæ фырты. Азымджын сæ кæнынц Промышленнон районы прокуроры хæдивæг Озиты Оледжы амарынæй дæр.
Фыдгæнджытæй иутæн стæрхон кодтой. Дыууæйæн сæ хъуыддæгтæ сты тæрхондоны. 10-æй та, уыдонимæ сæ разамонæг дæр сты дунеон æмæ федералон агуырды.
