Бабæрæг кодта Елхоты аграрон техникум, стæй Дзæджыхъæуы 7-æм училищæ. Дыууæ ахуыргæнæндоны дæр райстой гранттæ æмæ сæ схардз кодтой сæ материалон-техникон бындур
Уæрæсейы ахуырады æмæ наукæйы министры хæдивæг Александр Климов фыццаджыдæр бабæрæг кодта Елхоты аграрон техникум. Федта, куыд æххæстгонд у кусæн æрмæгæй. Ам хъæууон-хæдзарады специалисттæ кæй цæттæ кæнынц, уымæ гæсгæ сæм хъуамæ техникон фæрæзтæ фаг уа, загъта министры хæдивæг. 2008-æм азы техникум архайдта национ проект «Ахуырад»-ы конкурсы æмæ райста грант – 40 милуан сомы. Уыцы фæрæзтæй балхæдтой комбайнтæ, трактортæ, æндæр хъæууон-хæдзарадон машинæтæ.
Ахуырады æмæ наукæйы министры хæдивæг Александр Климов йæхæдæг дæр бафæлвæрдта ног егъау комбайн. Разыйæ баззад, Ирыстоны студенттæн ахæм хорз уавæртæ кæй ис ахуыр кæнынæн, уымæй. Студенттæн ацы техникæ тынг æххуыс у, сæ теоретикон зонындзинæдтæ ныффидар кæнынæн.
Александр Климовæн ма равдыстой, Дзæуджыхъæуы 7–æм училищæйы студенттæн цы уавæртæ ис ахуыр кæнынæн, уый дæр. Министры хæдивæг федта ахуырадон-куыстадон æмæ лабораторон кусæнгæрзтæ. Училищæйы сæ балхæдтой 2012-æм азы. Уæд райстой «Цæгат-Кавказы профессионалон ахуырады материалон-техникон бындуры рæзты» регионалон программæйы грант.
Министры хæдивæг куыд загъта, афтæмæй профессионалон ахуырады рæзтыл кусдзысты дарддæр дæр. Зæгъæм, сæ фæндтæй иу у – куыстуæтты саразын техникумты æмæ училищæты кафедрæтæ, цæмæй ахуырдзаутæ æвæстиатæй исой æцæг практикон зоынындзинæдтæ.
Гугкаты Иринæ
