Уазджытæ архайдтой инвалидты реабилитацион центр байгом кæныны кадджын мадзалы. Министр ма бабæрæг кодта республикæйы социалон объекттæ, сывæллæтты æмæ ацæргæ адæмы центртæ.
Уæрæсейы Федерацийы фæллойы æмæ социалон хъахъхъæнынады министр Максим Топилины æрбацыды нысан уыд – æркæсын фæсивæдæн куыст дæттыны, стæй инвалидты уавæр иртасыны фарстатæм. Уымæ гæсгæ Хицауады сæрдар Такъоты Сергейымæ æмæ Хицауады уæнгтимæ, фыццаджыдæр, бабæрæг кодтой медицинон-социалон экспертизæйы сæйраг бюро. Цы фадæттæ дзы ис, адæмимæ куыд кусынц, уымæй разыйæ баззад. Доййаты Оксанæ кусæндонмæ æрбакодта йæ фыд Хадзбечыры, цæмæй йын йæ æнæниздзинадмæ æркæсой.
Доййаты Оксанæ: «Инсульты фæстæ тынг æвзæр хъусын райдыдта, ам ын рафыстой реабилитацийы программæ. Загътой, хъусæн аппарат райсын нæ бон кæй у. Тынг хорз цæстæй нæм ракастысты æмæ сын бузныг».
Бабæрæг ма кодтой геронтологон центр дæр. Кусæндоны хъуамæ уа 100 бынаты. Уыдонæй 80 ныридæгæн цæттæ сты хæсты æмæ фæллойы ветеранты суазæг кæнынмæ æмæ сын алыхуызон медицинон лæггæдтæ кæнынмæ. Сывæллæтты социалон реабилитацийы центр «Рæдау зæрдæ»-йы уазджыты базонгæ кодтой рæзгæ фæлтæримæ кусыны мадзæлттимæ. Сæйрагдæр та уыд «Инвалидты реабилитацийы республикон центр» байгом кæныны мадзал. Максим Топилин куыд загъта, афтæмæй ахæм кусæндæттæ Уæрæсейы нæй, уымæн æмæ дзы алывæрсыг æххуыс кæныны фадæттæ ис. Уыцы иу рæстæг дзы æрбынæттон кæнæн ис 50 адæймаджы.
Кобесты Чермен, дунейы чемпион рог атлетикæйæ: «Ис ахæм адæм, сæ бон змæлын кæмæн нæу. Æмæ кæсынц иннæтæм, æмæ сæм хæлæг дæр кæнынц. Ахæм бынат куы уа, уæд уый хорз у. Дæхиуыл куы кусай, æмæ ма дын ахæм хорздзинæдтæ дæр куы кæной адæм, республикæ, дæ райгуырæн бæстæ, уæд адæймагæн йæ уд хуыздæр кæны».
Такъоты Сергей, РЦИ-Аланийы Хицауады сæрдар: «Инвалидтæ нæм бирæ ис, æмæ сын уавæртæ нæй, цæмæй исты архайой, кæрæдзийымæ ныхас кæной. Цы центр байгом кодтам, уымæй Максим Топилин дæр загъта, ахæм центртæ кæй нæй. Æхсызгон у, паддзахад дæр, Хицауад дæр сæхи кæй раздæхтой ацы фарстамæ».
Цæгат Кавказы федералон зылды субъектты минæвæрттимæ цы æмбырд ацыд, уым æрдзырдтой фæсивæдæн куыст дæттыны, стæй инвалидты уавæр бæрæг кæныны фадæттæ фæхуыздæр кæныны фарстатыл. Уый фæдыл Максим Топилин бæлвырд хæстæ сæвæрдта бæрнон разамонджыты раз.
Къаболаты Ларисæ, РЦИ-Аланийы адæмæн куыст дæттыны комитеты сæрдар: «Абон федералон министр нæ размæ цы хæстæ сæвæрдта, уыдон махæн зындгонд сты, фæлæ сæм тынгдæр не `ргом раздахæм, уый сæ фæнды. Нæ программæтæм гæсгæ, фæсивæдæн, ахуыр чи фæци, уыдонæн куысты бынæттæ кæнæм, фæлæ вæййынц рæстæгмæ. Бахæс нын кодта, цæмæй фылдæр цæст дарæм, хъыгдард сывæллæттæ кæмæн ис, уыцы сылгоймæгтæм».
Иумæйагæй афæдзы райдианæй нырмæ нæ республикæйы æгуыст адæмы нымæц фæкъаддæр. Уымæн, фыццаджыдæр, ахъаз сты, программæмæ гæсгæ цы мадзæлттæ конд цæуынц, уыдон.
Фæрниаты Мæдинæ
