Цæгат Ирыстонмæ ссыдысты сирийаг ирæттæ. Æлбегаты бинонтæ ралыгъдысты, ныртæккæ мидхæст кæм цæуы, уыцы бæстæйæ. Кæсæг-Балхъаримæ арæныл сын æгасцуай загътой Цæгат Ирыстоны национ хъуыддæгты министрады æмæ æхсæнадон змæлд «Иры Стыр ныхасы» минæвæрттæ.
Цæлагкаты Артур, æппæтдунеон æхсæнадон змæлд «Иры Стыр Ныхас» – ы президиумы уæнг: «Закъонмæ гæсгæ сын мах хуынды гæххæттытæ скодтам 3 мæймæ. Уыцы рæстæг куы ацæуа, уæд сын ис бар ног гæххæттытæ саразынæн сæ фыдæлты зæххыл цæмæй цæрой, куыд лыгъд адæм, кæнæ та кæд сæ уавæртæ фæхуыздæр уой, уæд фæстæмæ ацæудзысты Сиримæ».
Уылыбиаты Георгий – Кировы районы «Стыр Ныхас»- ы сæрдар: «Ардæм æрбацыдыстæм, цæмæй зоной цы бæстæмæ ссыдысты, цы бæстæйæ ацыдысты, уыцы адæмы зоной. Куы ацæуой, уæд махæй æвзæр ницы зæгъдзысты, уымæн æмæ махмæ ардæм чи цæуы, уыдон махæн сты зынаргъ. Уыдон цы уавæры сты, уый мах иууылдæр зонæм. Бæргæ куы нæ уаиккой ахæм уавæры. Фæлæ уæддæр ирон адæм хъуамæ кæрæдзиуыл хæцой».
