Гематологон æмæ онкологон низтæй хъыгдард сывæллæттæн медицинон лæггæдтæ куыд хуыздæр кæнæн ис, ууыл абон ныхас кодтой Цæгат Ирыстоны дохтыртæ æмæ мæскуыйаг специалисттæ.
Сенатор Хацъæты Оледжы хъæппæрисæй Цæгат Ирыстонмæ ссыдысты сывæллæтты гематологты национ æхсæнады специалисттæ. Сæ сæргъы Уæрæсейы наукæты академийы академик, Уæрæсейы æнæниздзинадхъахъхъæнынады министрады сæйраг гематолог Александр Румянцев.
Бабæрæг кодтой сывæллæтты республикон клиникон рынчындоны гематологон хайад. Республикæйы педиатртæн, хирургтæн, гематологтæн æмæ онкологтæн медицинон академийы конференц-залы сарæзтой ахуырадон семинар.
Хъалаты Зелимыл 2 азы цæуы. Дохтыртæ йæм рабæрæг кодтой онкологи. Ныртæккæ лæппу ис сывæллæтты республикон рынчындоны гематологон хайады боныгон стационары.
Зелимы æмæ иннæ сывæллæтты ныййарджытæ тынг бузныг сты, сæ кæстæртæм сын мæскуыйаг дохтыртæ кæй æркастысты, уымæй.
Сенатор Хацъæты Оледжы æххуысæй æмæ хъæппæрисæй Цæгат Ирыстонмæ ссыдысты сывæллæтты гематологты национ æхсæнады специалисттæ. Сæ сæргъы Уæрæсейы наукæты академийы академик, Уæрæсейы æнæниздзинадхъахъхъæнынады министрады сæйраг гематолог Александр Румянцев. Сæ цыды нысан у æркæсын рынчын сывæллæттæм æмæ сбæрæг кæнын гематологон æмæ онкологон низтæй хъыгдард сывæллæттæн медицинон лæггæдтæ куыд хуыздæр кæнæн ис, уый.
Мæскуыйаг дохтыртæ бабæрæг кодтой сывæллæтты республикон клиникон рынчындоны гематологон хайад. Ныртæккæ дзы онкологон низтæй рынчынты хыгъды ис 120 сывæллоны.
Мæскуыйаг дохтыртæ республикæйы педиатртæн, хирургтæн, гематологтæн æмæ онкологтæн медицинон академийы конференц-залы сарæзтой ахуырадон семинар. Бæлвырд ныхас цыд, медицинон лæггæдтæ куыд фæхуыздæр кæнæн ис, цавæр терапи кæнæн ис рынчын сывæллæттæн, цавæр ног технологитæй пайда кæнæн ис, уый тыххæй.
Сывæллæтты гематологты национ æхсæнады специалисттæ Ирыстоны уыдзысты 2 боны. Ныййарджытимæ кæндзысты консультацитæ, дохтыртимæ араздзысты семинартæ.
«Сæйрагдæр уый у» – зæгъынц мæскуыйаг специалисттæ, цæмæй онкологон низтæй хъыгдард сывæллæттæ æмæ æвзонг фæсивæд исой хæрзхъæд медицинон æххуыс.
