Цæгат Ирыстоны сæдæ мин адæймагæй фылдæрæн бар ис, льготæтæм гæсгæ хостæ исын. Æхца кæй нæ фаг кæны, уый тыххæй ацы хъуыддаджы æдзухдæр сæвзæры къуылымпыдзинæдтæ.
Ныр мæйы бæрц Тедеты Моисей афтеччы райсы ахæм дзуапп. Нæлгоймаг у 3-аг къорды инвалид. 3 азы размæ йæм рабæрæг аденомæ. Афæдз æмæ рдæг пайда кæны хос «Золадекс»-æй. Препарат у зынаргъ – 10 мин сомæй фылдæр. Фæлæ йæ Моисей хъуамæ льготæтæм гæсгæ иса лæвар. Инъекци хъæуы 2 мæйы иу хатт кæнын. Фæстаг укол ын конд æрцыд мæйы размæ.
Тедеты Моисей: «Уæнгтæ сæхи æвзæрдæр æнкъарынц. Уыцы укол куы скæнын, уæд хуыздæр вæййы. Уымæ гæсгæ дохтыр дæр афтæ зæгъы, алы мæй дæр хъæуы уыцы укол кæнын».
Хостæ кæй нæ фаг кæны, уый тыхсын кæны мингай адæмы республикæйы, зæгъынц æнæниздзинадхъахъхъæнынады министрады. Цæгат Ирыстоны 100 мин адæймагæй фылдæрæн æмбæлы льготæтæм гæсгæ хостæ лæвар исын. Ацы хъуыддаг æххæст кæнынæн 2014-æм азы республикон бюджетæй радих кодтой 180 милуан сомы. 9 милуаны фылдæр та – федералонæй. Фыццаджыдæр, лæггад кæнынц онкологи кæнæ сæкæрниз кæмæ ис, уыцы рынчынтæн.
Мелыккаты Светланæ, РЦИ-Аланийы æнæниздзинадхъахъхъæнынады министрады фармацевтон хайады хицау: «Уыцы фæрæзтæ чысыл не сты. Уæлдайдæр та иннæ субъекттимæ абаргæйæ. Зæгъæм, ис ахæм регионтæ, рынчынты ацы хостæй кæм не `ххæст кæнынц. Фæлæ ныртæккæ нæ бюджетæй фылдæр фæрæзтæ радих кæныны фадат нæй, хостæ кæй хъæуы, уыдон та сты дзæвгар».
Ахæм уавæр кæй сæвзæрд, уымæн ис 2 аххосаджы. Цы ног хостæ фæзынд, уыдон сты тынг зынаргъ, рынчынты нымæц та азæй-азмæ фылдæр кæны.
«Золадекс» афтекты фæзындзæн. Фæлæ, куыд тагъд, уый зын зæгъæн у. Æнæниздзинадхъахъхъæнынады министрады радих кæндзысты, иннæ рынчынтæн хостæ цы æхцайæ хъуамæ балхæдтаиккой, уыдонæй. Уый фæстæ арæзт æрцæудзæн аукцион. Ацы хъуыддаг ахæсдзæн 2 мæйы бæрц.
Хъайтмазты Дзерассæ
