14 марта 2018, 18:00
Цæгат Ирыстоны 200 сывæллонæн сæ дæндæгтæ сдзæбæх кæндзысты лæвар
Ахæм куыст цæудзæн, хæрзаудæн программæ «Уæрæсейы сывæллæтты мидбылхудт» æххæст кæнгæйæ.
Цæгат Ирыстоны 200 сывæллонæн сæ дæндæгтæ сдзæбæх кæндзысты лæвар. Ахæм куыст цæудзæн, хæрзаудæн программæ «Уæрæсейы сывæллæтты мидбылхудт» æххæст кæнгæйæ.
Специалисттæ пациенттæн кæндзысты нырыккон медицинон æххуыс, загъта Уæрæсейы Стоматологон Ассоциацийы Президент Владимир Садовский. Абон йæ разамындæй арæзт æрцыд конференци, æмæ радзырдта хæрзаудæн акцийы тыххæй. Ацы аз æй æххæст кæндзысты нæ бæстæйы 6 регионы. Фыццæгтæй иу сси Цæгат Ирыстон. Нæ республикæйы стоматологты Ассоциацийæн ис йæхи инновацион клиникон-диагностикон центр. Кусы Цæгат Ирыстоны паддзахадон университеты. Уым дзæбæх кæндзысты сывæллæтты дæр. Чысыл пациентты равзардзысты æххуысхъуаг æмæ бирæсывæллонджын бинонтæй. Владимир Садовскийы хъуыдымæ гæсгæ медицинон фæдзæхстады Фонды фæрæзтæ фаг нæ уыдзысты. Уымæ гæсгæ расидтысты ацы проект. Ис ма дзы ахуырадон программæ дæр. Дзæуджыхъæуы 28-æм скъолайы ахуырдзаутæн радзурдзысты дæндæгты низты ныхмæ профилактикон куысты тыххæй. Программæ царды рауадзынæн баххуыс кодта нæ республикæйы фæллойы æмæ социалон рæзты министрад, стæй горæты алминистраци.
темæмæ гæсгæ
