филиал вгтрк государственная телерадиовещательная компания “Алания”

Цæгат Ирыстоны æдасдзинады федералон управленийæн ис ног разамонæг Сергей Трушкин. Йемæ фембæлд нæ республикæйы Сæргълæууæг Мамсыраты Таймураз. Æрныхас кодтой Цæгат Кавказы уавæрыл, æдасдзинады фарстатыл. Цæгат Ирыстоны сæргълæууæг куыд загъта, афтæмæй фæстаг цалдæр азы инæлар-лейтенант Олег Яцковы разамындæй нæ республикæйы стыр куыст цыди. Ведомствойы фæлтæрддзинадыл дæр бафтыд. Мамсыраты Таймуразы хъуыдымæ гæсгæ, Сергей Трушкинæн ис хъæздыг биографи. Хорз зоны нæ регион æмæ йæ хицæндзинад Уæрæсейы иннæ регионтимæ абаргæйæ. Уымæ гæсгæ зæрдæ дарæн ис, æдасдзинады федералон службæйы ног разамонæджы бирæ рæстæг кæй нæ бахъæудзæн, ведомствойы архайдимæ бæстондæр базонгæ уæвынæн. «Нæ сæйраг хæс у барад хъахъхъæнын, æдасдзинадыл кусын æмæ республикæйы цæрджытыл аудын. Ууыл кусынц не ппæт тыхы структурæтæ дæр», – загъта Мамсыраты Таймураз. Сергей Трушкин райгуырд Мордовийы. Æдасдзинады паддзаххадон оргæнты кусы 1989-æм азæй.