Чи дзы пайда кæны, уыдонæн фадат ис, хæрзхъæд телеуынынадмæ кæсынæн. Фæлæ ис ахæм хъæутæ, нысанон телеуынынады сигнал кæдæм нæма хæццæ кæны. нырмæ кæмæй пайда кодтой, уый дæр уадиссаг æвдыст нæ кæны.
Уæллаг Бирæгъзæнджы цæрæг Абайты Виктория балхæдта нымæцон телеуынынад чи æвдисы, ахæм техникæ. Уый размæ йæм чи уыди, уый дæр уыд нырыккон, фæлæ йын хорз не вдыста. Ног нысанон аппаратурæ та æппындæр не вдисы. Хæрзхъæд нысанон телеуынынадмæ кæсыны фæндон Бирæгъзæнджы цæрджытæм хуымæтæджы нæ фæзынд. Афæдзы размæ хъæугæрон байгом кодтой нысанон радио æмæ телеуынынады чи æвдисы, ахæм станцæ. Республикæйы цифровизацийы программæмæ гæсгæ кæй сæвæрдтой, уыцы 30 объектæй у иу. Фæлæ нырмæ станцæ нæ кусы, кæдæ æмæ алцæмæй дæр цæттæ у, уæддæр. Республикæйы радио æмæ телеуынынады сигналдæттæг центры специалисттæ куыд зæгъынц, афтæмæй йæ аххоссаг у спутник. Йемæ бастдзинад нæй.
Нымæцон телеуынынадмæ кæсын сæ бон у Цæгат Ирыстоны хъæутæн сæ фылдæры. Сигналдæттæг центры кусджыты ныхæстæм гæсгæ, республикæйы 80 % хъæуты спутникы уылты ахсы хæрзхъæд сигнал. Къуылымпыдзинæдтæ ис фылдæр дæрддзæф хъæуты.
Спутничы ног бастдзинад царды куы рацыд, уæд фадат фæци нысанон телеуынынадæй канал «Вести 24. Алания» -йы эфиртæ трансляции кæнынæн дæр. Бынæттон телеуынынадæй сигнал цæудзæн спутникмæ, уырдыгæй та парахат кæндзæн зæххыл цы станцæтæ ис, уыдоныл. Бынæттон телеуынынады эфиртæ нын тынг нæ фаг кæны, зæгъынц Дæргъæвс æмæ Ламардоны цæрджытæ.
Горæтгæрон районы хъæуты ис нымæцон телеуынынад. Ныртæккæ æвдисынц 10 каналы. Фæлæ дзы уæддæр бынæттон канал нæ фаг кæны. Уыимæ æрмæст хистæртæн нæ, фæлæ кæстæртæн дæр.
Ныртæккæ ис бирæ нымæцон каналтæм кæсыны фадат, фæлæ æнæ республикон телеуынынадæй адæм сæхи регионы цардæй æнкъарынц иппæрд. Уымæ гæсгæ æнхъæлмæ кæсынц, хæрзхъæд телеуынынад сæм кæд фæзындзæн, уымæ.
