Дыууын иу азы размæ 30-æм октябры æхсæвæй 31-æм октябрмæ Мæхъæлы гæрзифтонг фыдгæнджытæ æрбабырстой Цæгат Ирыстонмæ Горæтгæрон районы иу хай байсыны тыххæй. Хæст ахаста фондз боны.
Дыууын иу азы размæ 30-æм октябры æхсæвæй 31-æм октябрмæ æрцыд æфсæддон ныхмæлæуддзинад. Райгуырæн зæхх бахъахъхъæнынмæ сыстадысты мингай лæппутæ. Фыдыуæзæг хъахъхъæнгæйæ чи фæмард, уыдоны номарæн ингæнтыл Октябрьскийы æмæ Дзæуджыхъæуы Намысы Аллеяйы абон æхсæнадон æмæ фæсивæдон организациты минæвæрттæ сæвæрдтой дидинджытæ.
Сугъараты Азæмæт: «Ныр ацы адæм нæ уыдысты, зæгъгæ, уæд ничиуал уыдаид ирон адæмæй. Ныппырх нæ кодтаиккой. Фæлæ ацы адæм баххуыс кодтой. Сæ цард мах тыххæй радтой».
Номарæн мадзæлттæ арæзт æрцыдысты Южныйы поселочы дæр. Дидинджытæ æмæ веноктæ сæвæрдтой фыдыуæзæг хъахъхъæнджыты цыртдзæвæныл. Дыууын иу азы размæ ам фæмард дыууын фараст адæймаджы. Бирæтæ сæ ныры онг нымад сты æбæрæгæй сæфтыл.
Сарахъаты Савелий: «Ацы иунæг ран, фæлæ агас Горæтгæрон районы алы хъæуы дæр сты сæ номыл цыртдзæвæнтæ. Мах царды сæрыл сæ цард радтой æмæ цы дунемæ бацыдысты, уым рухсаг уæнт. Мах та нæ фæсивæд хъуамæ афтæ хъомыл кæнæм æмæ сæ рох куыд нæ кæной, куыд сын хъуыды кæной сæ хъæбатырдзинад æмæ лæгдзинад. Раст фæндагыл сæ куыд аразæм. Алы аз дæр сæ мысæм, сæ ном арæм. Фæлæ кæрæдзийы уарзгæйæ куыд цæрæм, æнгом куыд уæм, ахæм амонд нын Хуыцау раттæд».
