Фыццаг туры архайдта 100 сывæллонæй фылдæр. Се ппæт дæр равдыстой хорз цæттæдзинад. Райсом конкурсы архайджытимæ ирон театры сценæмæ рацæудзысты нæ республикæйы зындгонд артисттæ дæр.
Цæгат Ирыстоны адæмон поэт Чеджемты Æхсары номыл 2-аг литературон-музыкалон конкурс «Стъалыты æхсæрдзæн»-ы фыццаг туры архайдта 100 сывæллонæй фылдæр. Сты республикæйы алы районтæй. Конкурсы домæнæтæм гæсгæ сæ бакæсын хъуыд æмдзæвгæ мадæлон æвзагыл, кæнæ та зарæг акæнын.
Конкурс арæзт æрцыд 2 азы размæ, Чеджемты Æхсары райгуырды 75 азы кадæн, республикæйы ахуырад æмæ наукæйы, стæй культурæйы министрадты хъæппæрисæй. Проекты автор у Сечъынаты Альбинæ.
Сечъынаты Альбинæ: «Уадз æмæ, зындгонд поэт куыд загъта, афтæ Ирыстонæй куыд хъуыса ирон аив ныхас, ирон фæндыры цагъд, уæд нæ бæстæ уыдзæн амондджын. Æмæ мæ фæнды, цæмæй уыцы ныхæстæ Ирыстоныл куыд æрцæуой».
Сывæллæтты курдиатæн аргъ кодтой нæ республикæйы зындгонд адæм Дауыраты Дамир, Абойты Риммæ, Сæлбиты Иринæ, Айларты Асæхмæт æмæ Хуыбиаты Зауыр.
Жюрийы хатдзæгтæм гæсгæ æвæзрст æрцыдысты, дыккаг туры чи архайдзæн, уыцы сывæллæттæ. Уый уыдзæн 24-æм апрелы ирон академион театры. Ацы изæр сценæмæ рацæудзысты нæ республикæйы зындгонд артисттæ дæр. Æркасты уæлахиздзаутæ хорзæхгонд æрцæудзысты кады гæххæттытæй æмæ æхцайы премитæй.
Абойты Риммæ, РЦИ-Аланийы сгуыхт артисткæ: «Ахæм мадзæлттæ, абон кæмæ бакастытстæм, уыдон фæстаг рæстæг нæ республикæйы арæхæй-арæхдæр кæй кæнынц, æмæ уый хорз хъуыддаг у. Уый ууыл дзурæг у, æмæ фылдæр æргом здахын райдыдтам нæ мадæлон æвзагмæ».
Ацы аз сывæллæттæ сæхæдæг равзæрстой æмдзæвгæты авторты, фæлæ сæйраг домæнтæй иу уыд, æнæмæнг ирон æвзагыл куыд кæсой. Ацы æркаст сси традицион æмæ та æнхъæлмæ кæсдзыстæм ног стъалытæм.
Моргуаты Ладæ
