Лæвар юридикон æххуыс райсыны фадатæй республикæйы бирæ адæм нæ пайда кæны. Уый тыххæй пресс-конференцийы фехъусын кодта Цæгат Ирыстоны адвокатты палатæйы президент Гаглойты Марк.
2013-æм азы ахæм æххуысмæ æрбацыдис æрмæстдæр 50 адæймаджы онг. Ацы лæвар лæггадæй спайда кæнын та йæ бон у гражданты 9 категорийæн. Журналистты фæрстытæн ма дзуапп лæвæрдтой, юстицийы министрады бæрны цы структурæтæ ис, уыдоны минæвæрттæ. Баст уыдысты коррупцийы, цæрæн-коммуналон хæдзарады лæггæдты фиддонты, республикæйы демографион уавæры темæтимæ. Тæрхондæтты пъырыстыфты федералон службæйы управленийы разамонæг Гæцойты Светланæ радзырдта, йæ ведомство ацы аз ахадгæ куыст кæй бакодта, уый тыххæй. Зæгъæм, алименттæ чи дары, уыдоныл конд уыд 3 мин 500 æрмæджы. Уыдонæй сæххæст кодтой 1 æмæ100. Уый службæйæн у рекорд, загъта республикæйы сæйраг пъырыстыф.
