Республикæмæ ссыдысты театралон институты профессортæ æмæ педагогтæ: Михаил Борисов, Мария ОссОвская, Анна Дубровская æмæ Владимир Гончаров. Фæстæдæр та уазджытимæ арæзт æрцыд пресс-конференци.
Щукины номыл институты ахуыргæнджытæ радзырдтой, юбилейон программæ æххæстгæнгæйæ кæй бабæрæг кæндзысты бæстæйы алы регионтæ. Фехъусын ма кодтой, республикæйы культурæйы министрадимæ кæй баныхас кодтой æнгомдæр æмгуыстад кæныныл. Журналисттæ фарстой, институты цæгатирыстойнаг рауагъдонты тыххæй.
Уазджытæ фæнысан кодтой, уыдон кæддæриддæр се `гъдау æмæ курдиатæй кæй фæхицæн кæнынц, уый. Хæбæлаты Фатимæ бафиппайдта, республикæйы культурæйы 5 стырдæр куыстуаты сæргъы Щукины номыл институты рауагъдонтæ кæй лæууынц, уый.
Цæриаты Валерий, традицион культурæйы æмæ этнотуризмы республикон центр «Фарн»-ы директор: «Уыцы стыр бæрæгбон – 100 азы Вахтанговы номыл скъолайæн – махмæ кæй райдыдта, уый стыр кад у. Бирæ фæлтæртæ ис махæн нæ театрты, уыцы скъола каст чи фæцис. Æвæццæгæн, æмбæлгæ дæр афтæ кæны. Уымæн æмæ Вахтангов йæхæдæг дæр ацы горæтæй уыд. Уымæ гæсгæ махæн æндæр гæнæн нæй, нæ курдиат махæн хъуамæ иннæтæй чысыл хицæн кæна. Вахтангов ардыгæй кæй уыд, уый ныл фылдæр хæс æвæры».
