Иу цасдæр рæсæтджы размæ дзул куы фæзынаргъдæр, уæд уый бирæтæм æнæнхъæлæджы хъуыддаг фæкаст. Зæхкусджыты ныхыстæм гæсгæ, хъуыддаг афтæ уымæн рауад, æмæ ацы аз æрдзон уавæртæ хорз нæ уыдысты
Иу цасдæр рæсæтджы размæ дзул куы
фæзынаргъдæр, уæд уый бирæтæм æнæнхъæлæджы хъуыддаг фæкаст. Зæхкусджыты
ныхыстæм гæсгæ, хъуыддаг афтæ уымæн рауад, æмæ ацы аз æрдзон уавæртæ
хорз нæ уыдысты. Рагзымæг, къæвдаджын уалдзæг – æмæ тыллæг, цас æнхъæлмæ
кастысты, уыйбæрц нæ рауад.
Хъæууон
хæдзарады министрады специалистты нымадмæ гæсгæ, республикæйы хъæуы
72-82 мин тоннæйы мæнæу. Тыллæг та рауад бирæ къаддæр æмæ фаг нæ кæны.
Сæвзæрд уавæрыл нæ дарддæры æрмæг.
Августæй нырмæ Цæгат Ирыстоны мæнæу
фæзынаргъдæр 40% æмæ рæзы дарддæр. Зæхкусджыты ныхыстæм гæсгæ сæвзæрд
æвзæр уавæр. Нæ фаг кæны, куыд фосæн кæй дæттынц, ахæм холлаг, афтæ ссад
кæмæй æрыссынц, ахæм мæнæу дæр.
Фарон фæззæг раджы кæй фæуазал кодта æмæ
мит кæй æруарыд, уый фæкъуылымпы кодта быдыры куыстытæ. Цы нысын
кодтой, уымæй æрæмбырд кодтой бирæ къаддæр. Уæдæ уалдзæг дæр зæрдæйы
фæндонмæ гæсгæ нæ уыд. Арæх къæвдатæ нæ уагътой техникæ быдыртæм
рацæуын.
Тотраты Олег, РЦИ-Аланийы хъæууон
хæдзарады министры хæдивæг: «Кæд зæххытæ бацæттæ кодтам, бацæттæ кодтам
минералон хъацæнтæ, цы æмбæлы уыдон иууылдæр балхæдтам. Мыггæгтæ дæр
цæттæ уыдысты, бакуыстам сыл, цæмæй сыл мацы бахъыгдара, уый тыххæй.
Фæлæ нæ æрдзон уавæртæ тынг фæкъуылымпы кодтой. Цы фæнд кодтам, уыдон
иууылдæр нæ байтыдтам».
Ныр уынæм фæстиуджытæ. Мæнæу нæ фаг кæны. Цы ис, уымæн та йæ хæрзхъæддзинад у хуыздæрхъæуаг.
Базарадон домæнтæ карз сты, æмæ уыцы
хъуыддаг æнæфæзынгæ нæ фæци фæлхасгæнджытыл. Алчидæр нæ йæхиуыл
банкъардта, цыбыр рæстæгмæ дзул цас фæзынаргъдæр, уый. Рæстæмбис нымадмæ
гæсгæ сси 15 сомы æмæ фылдæр.
Цæрджытæ тыхсынц, ссад дæр кæй
фæзынаргъдæр, уымæй. Дзулфыцæн куыстуæттæ ныр ссады голлаг æлхæнынц 890
сомæй. Йæ аргъ ма рæздзæн æви нæ, уый та зын зæгъæн у. Ныртæккæ фылдæр
ссад ласынц Краснодары æмæ Стъараполы крайтæй. Фæстæдæр куыд уыдзæн, уый
ничи зоны. Дзулфыцæн куыстуæтты хицæуттæ куыд зæгъынц, афтæмæй, ахæм
уавæры фыццаг хатт сты.
Тотраты Олег, РЦИ-Аланийы хъæууон
хæдзарады министры хæдивæг: «Пъланмæ кодтам цæмæй нæм тыд æрцыдаид 50
000 га фæззыгæндтæ. Фæлæ мит куыд рауарыд, афтæ нал атади. Æмæ нын ницы
уал бантыст. Æрмæстдæр 36 000 га. Уыдонæй дæр 32 хорæн».
Республикæйы экономикон райрæзты министрады æмбарын кæнынц.
Тенгиз Тиникашвили, РЦИ-Аланийы
экономикон райрæзты министры хæдивæг: «Кæд республикæйы хицауад
сæрмагонд уынаффæ рахæсса æмæ инвестицион фондæй спайда кæна, уæд уавæр
тæссаг нæу. Ома, цы хъæуы скæнын: кæд гæнæн ис, уæд мæнæу республикæйæ
æндæр рæттæм нал хъæуы ласын, фæлæ цы тыллæг æмбырд кæнæм уый нæхимæ
куыд зайа. Уæд республикæйы фаг уыдзæн. Æмæ дзул др нæ фæзынаргъдæр
уыдзæн, ссад дæр».
Уæдмæ та уал дзулфыцæн куыстуæттæ
æвзарынц зындзинæдтæ. Ис сæм æрмæстдæр иу фарста: сæ хæрдзтæ се фтиагтæй
куы фæфылдæр уой, уæд цæмæ кусынц? Æмæ цавæр хатдзæг скæнæн ис?… –
мæнæу ма куы фæзынаргъдæр уа, уæд дзулы аргъыл дæр бафтдзæн.
Зыхъуаты Жаннæ
