Сæ арæхстдзинадæн сын аргъ кодтой Уæрæсейы алы горæтты минæвæрттæ.
Бирæтæ дзы фыццаг хатт уыдысты Ирыстоны æмæ сæ стыр дисы бафтыдтой Цъæйы комы æрдзы нывтæ, хæхты рæсугъддзинад, сыгъдæг уæлдæф æмæ суадæтты адджын ад.
Бирæтæ дзы фыццаг хатт уыдысты Ирыстоны
æмæ сæ стыр дисы бафтыдтой Цъæйы комы æрдзы нывтæ, хæхты рæсугъддзинад, сыгъдæг уæлдæф æмæ суадæтты адджын ад.
Хæхты хъæбысы конд физонджытæ та ацы хатт рауадысты уæлдай хæрзаддæр.
Æвæццæгæн, ахæм адæймаг нæй, æмæ
физонджыты тæфмæ йæ комы дæттæ кæмæн нæ ауайынц. Уыцы бон Цъæйы коммæ
чи æрбафтыд, уыдон та уыдысты цымыдисаг бæрæгбоны æвдисæн. Цæгат
Ирыстоны фыццаг хатт арæзт æрцыд физонджыты бæрæгбон. Растдæр зæгъгæйæ
та, физонæггæнджыты дæсныйады конкурс. Домæнтæм гæсгæ дзы, ацы хатт
архайдтой 3 æрыгон лæппуйы сæрмагонд дæсныйадимæ. Стæй чи куыста,
ахæмтæ. Конкурсы жюри сын аргъ кодта 3 номинацимæ гæсгæ: хуыздæр
физонæг каркæй, фысы дзидзайæ æмæ стуры фыдæй. Уымæй уæлдай жюри
кастысты, дзидзиамæ цы гарнир æмæ цавæр сæн бацæттæ кодтой, уымæ. Цавæр
кæрдæджытæ æмæ хъацæнтæй пайда кодтой, уымæ.
Конкурс аразджыты ныхæстæм гæсгæ,
сæйрагдæр уый нæ уыд, фæлæ адæм кæрæдзиимæ кæй æмбæлынц. Ахæм конкурсы
руаджы кæй базонынц ирон адæмы традицитæ æмæ æгъдæуттæ.
Козаты Валерий, хæххон спорты хуызты
федерацийы сæргълæууæг: «Цæмæй адæм кæрæдзийы æмбарой. Куыд зоной нæ
рагон æгъдæуттæ, фынгыл хи куыд дарын хъæуы, уый тыххæй дæр у арæзт ацы
бæрæгбон. Уæдæ ардæм æрбацыдысты кæстæртæ дæр, хистæртæ дæр. Кувгæ та
кæнæм æрмæстдæр бæгæныйæ. Тынг нæ фæнды цæмæй Цъæйы сæвзæра ног æгъдау.
Цæмæй сомбоныл хъуыды кæнгæйæ цæрæм, цæмæй нæ кæстæртæ махмæ кæсгæйæ,
рæсугъдæй рæзой æмæ зоной нæ фыдæлтæй нын цы баззад, уый».
Физонджыты бæрæгбонмæ уазджытæ ссыдысты
Уæрæсейы алы горæттæй. Æмæ сæ хъæлдзæгдзинадæн кæрон нæ уыд. Се ппæты
дæр дисы бафтыдта канд æрдзы рæсугъддзинад нæ, фæлæ ма адæмы уды
сыгъдæгдзинад. Сæ ныхæстæм гæсгæ, Ирыстоны цæрджыты зæрдæтæ сты сыгъдæг
хæххон суадæтты хуызæн, къæдзæхау фидар, арвы тыгъдадау парахат. Сæ
уазæгуарзондзинадæн та æвдисæн ахæм бæрæгбæттæ.
Хестанты Михаил, Цъæйы администрацийы
специалист: «Ацы бæрæгбон ууыл дзуры æмæ иу кæны адæмы. Адæм фæстæмæ
цæуын райдыдтой ацы коммæ. Чи баулæфынмæ. Чи ам æрбынат кæны. Æмæ уый
хорз у. Цъæй райста йæ дыккаг цард. Æмæ мæ бузныг зæгъын фæнды ацы
бæрæгбон чи æрхъуыды кодта, уыдонæн. Рæсугъд рауад æмæ дарддæр ноджы
рæсугъддæрæй кæй цæудзæн, уый мæ уырны. Адæм дæр нæм фылдæр цæудзысты,
зондзысты Ирыстоны тыххæй. Сæхи бæстæтæм куы ацæуой, уæд дæр кæндзысты
нæ хорзы кой. Æмæ уый дæр æвзæр хъуыддаг ничи схондзæн».
Конкурс аразджытæ бацархайдтой, цæмæй
конкурсанттæ сæ зæрдыл бадарой ацы бæрæгбон æмæ дзы ногæй архайой,
ууыл. Кады гæххæттытæ æмæ дипломтæй уæлдай уæлахиздзауæн саккаг
кæндзысты сызгъæрин уæхст. Азæй-азмæ лæвæрд цæудзæн ног уæлахиздзауæн.
Конкурс 3 хатты чи рамбула, уымæн та балæвар кæндзысты йæ номыл мангал.
Фыццаг конкурсы уæлахиздзау сси Руслан Тисов.
Зыхъуаты Жаннæ
